دیموكراسی یاخود دیموكداعش؟

2 مانگ پێش ئێستا

شەماڵ بارەوانی
هەڵەحاڵی بون لەچەمك و واتای دیموكراسیەت ئەوەیە پێتوابێت، دیموكراسییەت واتا بەكارهێنانی دیموكراسییەت، بۆ لێدان لە دیموكراسییەت، جوێندان بەدیموكراسییەت و بڕینەوەی درەختی دیموكراسییەت، بێ ڕێزی كردن بە جیاوازییەكان، بەكەم سەیریكردنی ژن و سوكایەتی كردن بە یەكسانی جێندەری و مافەكانی مرۆڤ، هەڕەشەكردن لەئارامی و ئەمنیەتی وڵاتان، ڕەتكردنەوەی چەمكەكانی پێكەوەژیان و فرەیی ، بانگەشەكردن بۆ چەسپاندنی شەریعەت و دروستكردنی حوكمەتێكی سیوكراتی پۆپۆلیستی تۆتالیتار و پۆلیسی سەركوتكار، سڕینەوەی نۆرم و بەها باڵا مەدەنیەكان، ئەزیزم جارێ تۆ هەڵە لەدیموكراسی حاڵی بوویت و لەخەیاڵدا دەژیت!

ئاخر دیموكراسیەت ئەوە نییە، دەرفەت بدەیت بەكەسێك كە گەردیلەیەك بڕوای بەدیموكراسی نەبێت و دیموكراسی تەنها وەك تاكتیك و گەمەو فریودان و پەیژەیەكی كاتی بۆگەیشتن بەئامانجە ترسناكەكەی و خەونە مەزهەبی و ئایینیەكانی بەكاربێنێت، تا ئەوكاتە لەناو گەمەی دیموكراسی دا بێت، كە بێ دەسەڵات و لاوازە، كەی دەسەڵاتی بوو ئیدی دەبێ فاتیحای فەنابوون و لەناو چوون بۆ گیانی پاكی دیموكراسی بخوێنین و بە شمشێرە ئایدیۆلۆژی و مەزهەبی و نادیموكراسیەكەی سەری دیموكراسی ببڕێت و داری دیموكراسی لەڕەگەوە هەڵقەنێت و هەموو ئاسەوارێكی دیموكراسی بسڕێتەوە!

ئەزیزم دیموكراسی بەر لەهەموو شتێك ڕێزگرتنە لەبنەماكانی دیموكراسیەت (داننان بەجاڕنامەی گەردوونی مافی مرۆڤ، داننان بەمافەكانی ژن، بەچەمكەكانی لێبوردەیی و یەكسانی و ئازادی تاك و پێكەوەژیان و پلۆرالیەت و قبوڵكردنی ئەویتروسوكایەتی نەكردن بەهیچ كەسێك لەسەر جیاوازی ئایینی،نەتەوەیی و ئیتنی و مەزەبی، ڕەكردنەوەی بیری ڕەگەزپەرستی و جیاكاری ..تاد).
ئەگەر دیموكراسی وا نەبوو ئەوە دڵنیابە دیموكداعشە، نەك دیموكراسی.

بەقوربان، دیموكراسیەت ئەوە نییە غەنوشی ئیخوانی و نەهزەی ئیسلامی لە تونس یاسا مەدەنیەكانی دەوڵەت، بگۆڕن بۆ شەریعەت و هەوڵی لەخنكاندنی دیموكراسی بدەن و ئیخوان لەمیسر دوو ڕۆژ دوای گەیشتنیان بە دەسەڵات، كودێتا بەسەر دەستوردا بكەن و مادەكان و یاساكان بەمادەی ئایدیۆلۆژی و ئیخوانی و ئایینی بگۆڕن.
دیموكراسیەت ئەوە نییە مونیرە خانی مەلا عەلی عەبدولعەزیزی ڕابەری كۆچكردووی پێشووتری بزوتنەوەی ئیسلامی بە هاوڕەگەزەكان بڵێت بێ ئەخلاق و بێ ڕەوشتن.
بابای ئیسلامی یەكگرتوو سكاڵا لەسەر زانكۆی دهۆك تۆماركات ،بەبیانووی ئەوەی لەو زانكۆیە لەمەراسیمێكدا كۆمەڵەك كچی ئامادەبووی بیانی سەمای ناشەرعیان كردووە (دەسەڵاتیان بێ،لەجیاتی سكاڵا، دادگایی و لەقەنارەیان دەدەن). 
گیانەكەم دیموكراسی ئەوە نییە دكتۆر عەبدولواحدی كۆمەڵی ئیسلامی بڵێت كچ، لەكچنی (kitchen) ئینگلیزییەوە هاتوە، واتا ژن و چێشتخانە، نەك كاری دەرەوە و هاتنە دەرەوە لەماڵەوە و  سوكایەتی بەئێزدیەكان بكات و بڵێت لەبەیانی تا ئێوارە كاریان پێبكە و ئێوارە كاتێك داوای كرێی كارەكەی كرد پێی بڵێ ئەه بەنەعلەت بێ شەیتان (وەك ئیهانە) بیرم چوو كرێكەت پێ بدەم.

دیموكراسیەت ئەوە نییە مەلا لەتیف سەلەفی بڵێت گەر خوێندەكاری ئێزدی لەگەڵتا بوون لەكۆلێژ، كاكی سەلەفی نابێت، چاكەیان لەگەڵ بكەیت و سڵاویان لێ بكەیت و تێكەڵیان ببیت، چونكە ئەوان فەرمەسۆن و بێ بڕواو كافرن، چاكە كردن و سڵاوكردن و تێكەڵاو بوونیش لەگەڵ كافر ڕێگەپێدراو نییە!
 دیموكراسیەت بۆی نەبێت بڵێت كاك مەلا پشتی چاوەكانت دوو برۆیە

دیموكراسیەت ئەو نییە مەلا ڕەمەزان قادركەرەمی سەلەفیگەرا، بە شمشێری سەلەفیگەرایی هەڕەشەی تۆقاندن و مل پەڕاندن لە نوێژنەكەر بكات و بڵێت كاتێك ئێمە دەوڵەتی دینی و سەلەفیگەرامان بوو،ئ ەوە سێ جار بەنوێژنەكەر دەڵێین كوڕە نوێژ بكە، كوڕە نوێژ بكە، كوڕە نوێژ بكە، گەر نەیكرد، ئەوە دەدەین لەملی ۆ سەری لەلاشە جیادەكەینەوەو دیموكراسیش بۆی نەبێت لێ پێچینەوە لەگەڵ سەربڕێكی ئاوا بكات! 

دیموكراسی ئەوەنییە ڕێگەبدرێت ئەو كتێبە فقهی و توراسیانەی، كەهەڵێنجراوی تێگەیشتنێكی دۆگمایی تەسك و داخراو نامرۆڤانەی سەدەكانی ناوەڕاستن و هانی توندوتیژی و بەكۆیلەكردن و بەكەنیزەكردن و كوشتن و سەربڕینی مرۆڤ و جیاوازی ڕەگەزی و بیری ڕاسیم دەدەن و  بەهۆی ئەنجامنەدانی نوێژەوە، باسی فڕێدانی لاشەی مردوو بۆ بەردمی سەگەكان و، جیاكردنەوەی هاوسەرەكان لەیەكتری دەكەن و لەوڵات  بەكاهی دڵی خۆیان ئەم دەست و ئەو دەستیان پێ بكرێت و تەراتێن بە ئەقڵی تاك و ژیانی مرۆڤەكان و ئازادییەوە بكەن و هەڕەشە لەسەر كۆمەڵ و ئایندەی پێكەوەژیان و بنەماكانی دیموكراسیەت و پڕەنسپەكانی مرۆڤ بوون دروست بكەن و دیموكراسیەتیش بۆی نەبێت یاساخ و قەدەخەیان بكات.

كاكی هەست ناسك دیموكراسیەت  ئەوە نییە مەلا ئیسماعیل سوسەیی لەناو جەرگەی پایتەختی هەرێمی كوردستان، بەنهێنی كۆنتاك و پەیوەندی لەگەڵ تیرۆرستانی داعش ببەستێت و هەوڵی تێكدانی ژیان و ئارامی هەولێرو كوردستان بدات و  لەوتارە ئاگرینەكانی كە هەمووی بۆنی بەغدادی و تیرۆریان لێد دێت، ژەهری تیرۆر بڵاو بكاتەوە، كەسیش بۆی نەبێت، سزای بدات و بەوپەڕی ئازادییەوە ئازادانەكاربكات بۆ بە داعشكردنی گەنج و جەوانی كوردو كاتێكیش لێی ئاشكرادەبێت، كە ڕایەڵەو پەیوەندی لەگەڵ چەتەكانی داعش هەیە، دەگیرێت و دادگاو زیندانی دەكرێت، كاكی ئیسلامی بڵێت ئەوە كو دەبی مەلا ئیسماعیل سوسەیی داعش زیندانی بكەن، كوا ئازادی و دیموكراسیەكەتان!! 
ئاخر بەستەزمان گیان دیموكراسی ئەوە نییە مەلاكرێكار لەناو جەرگەی نەروێژ و ئەوروپای عەلمانی و دیموكراتیدا، بەدارو بەرد و عارد و عاسمان و ئینسانیەت و دیموكراتیەت و مۆدێڕنەت و هەموو جوانی و بەهاباڵاكانی ئەو وڵاتەدا هەڵبشاخێت و تف و نەفرینیان لێ بكات، ئەو وڵاتەی كە چارەكە سەدەیەك زیاترە، ئەو مرۆڤە دۆپشك و سپڵەیەی لەباوەشی خۆی گرتووە و غەرقی نازو نیعمەتەكانی عەلمانیەت و دیموكراسیەتەكەی خۆی كردووە، لەپاڵ ئەمەش  گروپی جیهادی و تیرۆرستی دروست بكات و بانگەشە بۆ دەوڵەتێكی تیرۆرستی و فیكرە تیرۆرستیەكەی سەید قوتبی تیۆرسێن و باوكی تیرۆرستەكان بكات و هانی گەنجان بدات بڕۆنە ناو دەوڵەتە تیرۆراویەكەی خەلافەتی ئیسلامی بەغدادی و ئەوروپاو دیموكراسیەتەكەی بۆیان نەبێت لەسەر بیرە توندئاژۆیی و كارە تیرۆرستیەكانی  لەگوڵ كاڵتری پێ بڵێن، نەوەك ئیسلامیە هەست ناسكەكانی لای خۆمان هەستیان برینداربێت و بلێن ئەوەیە دیموكراسیەتی غەرب و عەلمانیەكان؟ 
وەیش ئەوە چۆن دڵتان دێت و كو دەبیت هێندە بێ ڕەحم و بێ بەزەیی بن و پەپولەیەكی وەك مەلا كرێكاری بەستەزمان و بێ تاوان و لۆ خواو جیهاد سوڵحاو لۆ دروستكردنی گروپێكی تیرۆرستی لەشاخ و خەلافەتە داعشیەكەی بەغدادی تێكۆشاو  ڕاكردو لێرە لەبەر كەیسی تیرۆرو خێڵی خەمە دادگایی و زیندانی بكەن!؟