پرسی موچەی خانەنشینی

3 مانگ پێش ئێستا

فوئاد سدیق
پرسی بڕین یان راستكردنەوەی مووچەی خانەنشینی پلە تایبەتەكان لەم یەك دوو ڕۆژە بەگەرمی كەوتە بەرباس‌و ئەمڕۆش هەڵوەستەی لەسەركرا، تا ئەوكاتەی ڕاژەو خزمەتی یەك بەیەكی فەرمانبەری پلەتایبەت دێتەبەردەست، ئینجا بڕیاری پێویست‌و كۆتایی لەبارەیەوە بدرێت..

سەرەتا من نە داكۆكی لەو بڕیارە دەكەم، نە داكۆكیش لەو پلەتایبەتانە دەكەم كە موچەكانیان بەشێوەیەكی كاتی ڕاگیراوە، لەبەرچی، چونكە هەر پێدانی پلەی تایبەت بەزۆرێك لەوكەسانە هەر لەبنەڕەتدا هەڵەبووەو، هەندێكیان زۆرێك لەو پلە تایبەتانە شایانی ئەو پلەیە نەبوو نەكە چەندین ساڵە وەریانگرتووە.

لەوەش كارەساتبار تر هەندێك لەو پلە تایبەتانە، كە ئەمڕۆ موچەكانیان ڕاگیراوە، وەك بڵێی كێچ كەوتبێتە كەوڵیانەوە، بەڕاست‌و چەپ بەبەژن‌و باڵای خۆیاندا هەڵدەدەن، هەر شاباش شاباشیتیان‌و كەسیش نییە ئاوازێكیان بۆ بژەنێ! لەكاتێكدا شایانی پلەی تایبەت نەبون.!

ئەمڕۆ بینیمان هەندێك لەوانەی دەستیان بەنووسینی رەخنە ئامێز گرتبوو، لەو بڕیارەی كە موچەكانیان پێڕاگیراوە، زیاتر ئەوكەسانە بوون، كە هەر لەبنەڕەتدا پێویستیان بەو مووچە كەمە نییە كە مانگانە وەریدەگرن، چونكە نەك هەر لەكوردستان،  بەڵكو لەناو ئەوروپاش خاوەنی چەندین خانوبەرەو خاوەنی چەندین ڤێلان، ماڵ‌و منداڵەكانیشیان هەر لەئەوروپا دەژین، بەڵام لەوێش كرێچی نین، بەڵكو ڤێلاكەیان لەبەرزترین شوێنی ئەو وڵاتەیە كە تێیدا دەژین. سەیرم پێدێت، كەسێك خاوەنی دەیان‌و بگرە سەدان ملیۆن دۆلاربێت، تەنها ئەو ڤێلایەی منداڵەكانی تێیدا دەژین، بەهاكەی زیاتر لەچەندین ملیۆن دۆلاربێت، بەڕاستی جەسارەتی دەوێت بێی ڕەخنە بگری!، كەس نییە پێی بڵێت جەناب تۆ بەچ پێوەرێك بووی بەپلەی تایبەت! بەچ پێوەرێك بووی بەخاوەنی دەیان ملیۆن دۆلار! بەچ پێوەرێك پاسپۆرتی وڵاتێكی ئەوروپیت لەگیرفاندایەو هەر كاتێك حەزت لێبێت بۆی دەردەچیت‌و هەركاتێكیش دڵت ویستی دەگەڕێیتەوە ئەم هەرێمەی ئێوە كاولتان كرد؟! سەیركەن ئەم وڵاتە چی بەسەرهاتوە، ڕاستیان گوتوە، هەتا خاوەن ماڵ دزی گرت، دز خاوەن ماڵی گرت!!.

من دەیان كەس دەناسم پلەی تایبەتن، لەژیانیشیاندا یەك ڕۆژ پێشمەرگایەتیان نەكردوەو هەر پیاوی پێشمەرگایەتیش نەبونە، كەچی بەپلەی تایبەت خانەنشینكراون ئەمە تائێرە لەم هەرێمە وێرانەی ئێمەدا زۆر نۆڕماڵ‌و ئاساییە (كە لەجەوهەردا زۆر زۆر نائاسایی‌و نایاساییە)، كەچی سەرباری ئەمانە، خۆیی‌و منداڵەكانی لەئەوروپا دەژین‌و ئەو موچەیەی لێرە وەریدەگرن، زۆر پوختە دەیبەن لەئەوروپا خەرجیدەكەن!. ئەمە لەكوردستان نەبێت، لەهیچ كونجێكی ئەو جیهانە كاری قێزەونی لەمجۆرە قبوڵناكرێت، دەزانن بۆ؟ چونكە ئەمەش جۆرێكە لەخیانەتی نیشتمانی.. ئۆكرانیا دوای ئەوەی لەیەكێتی سۆڤێت جیابووەوە، هەموو پشتبەستنی بەوانەبوو كە نزیكەی سێ ملیۆن كەس لەدەرەوەی ئۆكرانیا لەئاوارەیی دەژیان، بەڵام ئەو سێ ملیۆنە هاوكاری زۆری ئۆكرانیایان دەكرد بۆ ئەوەی ڕووبەڕووی قەیرانی ئابووری نەبێتەوە!!  سەیری ئەم هاوكێشەیە بكەن، كەچی خەڵكی ئێمە كە لەدەرەوە دەژین، پارەو پوول‌و مووچە ئاودیوی ئەوروپا دەكەن‌و پێی دەژین، تەئكید دەكەمەوە، هیچ وڵاتێك ئەمە قبوڵناكات، تەنیا هەرێمی كوردستان نەبێت.

لەگەڵ ئەوەشدا بێگومان، خەڵكانێكی زۆر مافی تەواوی خۆیانە مووچەی خانەنشینی وەربگرن، چ تەمەنێكی درێژیان لەپێشمەرگایەتی بردبێتەسەر، یان ئەوانەش تەمەنێكی درێژ فەرمانبەر بوونەو پێویستە بەیاسا ڕێكبخرێتەوە، ئەمە مافێكی زۆر زۆر سەرەتایی‌و ئاسایی خۆیانە.