بەدوای گۆڤەنددا مەگەڕێن

08/09/2021

سەردەشت محمد
بڵاوبونەوەی گرتە ڤیدیۆی چەند كچ و كوڕێكی هەرزەكار لەنێو تۆڕە كۆمەڵایەتیەكاندا كە تیایدا ناوی گۆڤەندێك دەهێنن و هەموویان لەبەرامبەریدا یەك ڕستە دوبارەدەكەنەوە ئەویش پەشیمان بونەوەیانە لەكارێكی نەشیاو كە لەپێشوتردا ئەنجامییانداوە و ئێستا پەشیمانن لەئەنجامدانیان و داوادەكەن كە گۆڤەند ئابڕویان نەبات، بووە بەجێگای مشتومڕی دەزگاكانی ڕاگەیاندن و هێزە ئەمنییەكان و تۆڕە كۆمەڵایەتییەكان و تەنانەت شەقامی كوردیش، هەموان بەوپەڕی ئارەزوەوە چاوەڕێن هەتاوەكو ناسنامەی ئەم گۆڤەندە ئاشكرا ببێت بەڵام، لێردەدا ئەركی ئێمە نییە كە بەدوای ناسنامەی گۆڤەندا بگەڕێین، ئەوەندەی بەئەركی خۆمانی دەزانین كە سەرقاڵی وەڵامدانەوەی ئەو پرسیارەبین كە لە خەیاڵی ئێمەدا دروست بوەو ڕۆژانە لەخۆمان دەپرسین كە ئەوە چی پەتایەكە وایكردووە كۆمەڵگای كوردی بەم جۆرە دەردەدار و بێهێز و داڕوخاوبێت؟ 

ئەمە لەكاتێكدا چەند ساڵێك بەرلەئێستا كورد ئەگەر تەنها شتێك كە شانازی پێوە بكردایە ئەخلاقی بەرزی كۆمەڵگا و تاكەكانی بوو، كەچی ئێستا چی لەسەر ئاستی تاك و چی لەسەر ئاستی كۆمەڵگاش زۆرینە دوچاری دوركەوتنەوە لە بەها كۆمەڵایەتیەكان و پرنسیپە ئەخلاقییەكان بوینەتەوە.

 ڕەنگە بتوانین زۆر بەئاسانی دەست بخەینەسەر برینەكان و هەموو هۆكار و پاڵنەرەكانی پشت ئەم داڕوخانە ئەخلاقییە دیاریبكەین، هۆكارەكان زۆرن و هەریەكەیان بەجۆرێك لەجۆرەكان توانیویانە كاریگەری گەورەیان لەسەر كۆمەڵگا هەبێت، بەڵام دەكرێت لێرەدا دەست بخەینە سەر تاكە هۆكارێك كە بەبڕوای من دەتوانین بە فاكتەری سەرەكی بڵاوبونەوەی ئەم پەتایە دەستنیشانی بكەین، ئەویش پەراوێزخستن و بێبەهاكردنی پرۆسەی پەروەردە و فێركردنە لە كۆمەڵگای كوردیدا، ڕوونە ئەم بێبەهاكردنەش وەنەبێت بەتەنها بەهۆی نەزانین و ناشارەزایی و بێئاگایمان بێت دەربارەی گرنگی پەروەردە، بەڵكو دەتوانین بڵێین بە پێی بەرنامەیەكی پلان بۆداڕێژرا و چی لەناوخۆ و چی لەسەرئاستی دەرەوەشدا كاری جدی لەسەردەكرێت و ئێستا ڕۆژ لەدوای ڕۆژ دەرئەنجامەكانی ئەوپلانە پڕمەترسییە هەست پێدەكەین و كە ئەگەربێت و هەوڵێكی پێچەوانە بۆڕاست كردنەوە و لەكارخستنی ئەوپلانە نەخەینەگەڕ ئەوا دورنییە لەداهاتویەكی زۆرنزیكدا ماڵێك نەبێت كەدوچاری ئەم پەتایە نەبێتەوە.
ئەگەرچی بەلای زۆرێكمانەوە كارێكی مەحاڵ و نەكردەیە كەتازە بتوانین ئەم هاوكێشەیە پێچەوانە بكەینەوە و جارێكی دیكە بتوانین كۆمەڵگا بخەینەوە سەر ڕێچكەدروستەكەی جاران، بەڵام دەتوانین ئەم موعجیزەیە بخوڵقێنین بەمەرجێك نێتی ڕاستكردنەوەمان هەبێت و دوبارە بەرنامەڕێژی بۆ ڕاستكردنەوەی پرۆسەی پەروەردە و فێركردن بكەین، كە دەڵێین پەروەردە مەبەست لێی ئەوپرۆسە دەستەجەمعێیە كە هەمووان بەبێ جیاوازی بەشێك لەئەرك و بەرپرسیارییەتیمان دەكەوێتە ئەستۆ، ئەگەربێت و لەخەمی ڕاستكردنەوەی پەروەردەدابین ئەوا ڕێگاچارەكان زۆرە بۆ ڕاست كردنەوەی، بەڵام ئەگەر بێت و ڕاستكردنەوەی باری لاری پەروەردە نەكەین بەخەمی هەمووان ئەوا دەبێت چاوڕێی كارەساتێكی هێندە گەورەبین كە سەرنجام بە داڕوخانێكی گەورەی كۆمەڵگای كوردی كۆتایی پێبهێنرێت، وەك چۆن ئەكتەری دیاری میسری محمد سوبحی باس لەوەدەكات كە بۆ ڕوخاندنی شارستانییەتیەك سێ هۆكار بەسە كە سەرەكیترینیان بێنرخ كردن و تێكدانی پەروەردەیە، بۆیە هەركات توانیمان خەمی گەڕانەوەی بەها بۆ پەروەردە بكەین بەخەمی زۆرینە ئەوا نەك پێویست ناكات بەدوای ناسنامەی گۆڤەندا بگەڕێین، بەڵكو شتێك نامێنێت بەناوی گۆڤەندەوە