ئەسڵی مەسەلەكە ئەمەیە

09/09/2021

ستران عەبدوڵلا
ئێمە لە بنچینەدا كوڕی بزوتنەوەیەكی شۆڕشگێری یاساغین، لەتەواوی (كوردستانەكان) و وڵاتانی دراوسێدا قاچاخی سیاسیین و خۆشیان پێمان نایە. 
كوڕی بزوتنەوەیەكین ستوونە پتەوەكەی پێكهاتنی، بەهانە سەرەكییەكەی دروستبوون و مانەوەی تا ئێستای ماف و داخوازییە نیشتمانیی و نەتەوەییەكانە. بەم مانایە ئێمە بزووتنەوەی مافەكانین. 
بۆ ئەوەی ئەم شرۆڤەش جێی خۆی بگرێ و مانای خۆی وەربگرێت گەرەكە ئێمە خەسڵەت و پێگەی خۆشمان بزانین. بزووتنەوەی كوردایەتی تا ئێستاش بزووتنەوەیەكی قاچاخ  و دانپیانەنراوە. (لەم بەشەی باشوور دانپیانانێكی نیوداشی هەیە) ئەوەی تێیدایە و خزمەتی دەكا، ئەوەی پێشمەرگەیەتی و هەڤاڵی ریزەكانێتی نە دەترسێ و نە دەبێ بترسێ، هیچ سوكایەتی و جوێن و زبری و هەڵچوونێكی ناڕەوا پاشگەزی ناكاتەوە، بۆیە هەق نییە كەس هەڕەشە و گوشارمان لێ بكا و  تۆمەتی ئاست نزم و شەرمەزارمان بۆ بتاشێ. لە داگیركەر نەترسین حەتمەن لە جاشی فیكری و مەفرەزەی  رەدوكەوتوو و میلیشیای ئەلكترۆنی ئێوە ناترسین. 

بە ویژدانی گیانبازێكی ئازادیخوازەوە لەهەر وێستگەیەكا تۆزێ بیری لێ دەكەینەوە و كەمێ دەست لەسەر دڵ دادەنێین تا بە(چاوی دڵ) هەڵسەنگاندن بكەین و كەمێكی زۆریش دایبرێژین ئینجا بڕیارە دروستەكە بدەین. 

لەبەر ئەوە لێكدانەوەیەكی هەڵەیە هەندێك كەس پێی وابێ بە زبری و زەبر دەتوانن كار لە روانین و بژاردەكانمان بكەن. 

هەر لەرێوە ئەو قەدەرەمان هەڵبژاردووە، لەبنچینەدا كە پێشمەرگەین، دیارە پێش مەرگ كەوتوین. كوڕ و كچی كوردایەتیین بە ستایڵی یەكێتیانە و جەلالیانە، بۆ هەوەس و فیز پێشمەرگە نیین، بۆ روانینی خۆمان دەروێشین، بە سروشتی بزووتنەوەكەمان قاچاخین فەقەت قاچاخچی نین و بە ئیستلاحی كۆنی عوسمانی (ئەشقیاین) یان (عوساتین) لە پێناوی مەسەلەیەكی رەوادا كە مەسەلەی نەتەوە و نیشتمانەكەمانە.