سینەما و ١١ ی سێپتەمبەر

12/09/2021

شكار جەمال
ڕووداوەكانی ١١ی سێپتەمبەری ئەمریكا، ئەو ڕۆژەی كە مێژووی مرۆڤایەتی گۆڕی و كردییە دوو بەشی پێكهاتوو لە  سەردەمی پێش و پاشی ١١ی سێپتەمبەر هاوشێوەی ئەم سەردەمەی ئێستامان كە دوبارە كراوەتە دوو بەش لە پێش و پاشی سەردەمی كۆرۆنا  .

ڕووداوەكان ئەوەندە كاریگەر بوون لە نێو ئەمریكا، بە جۆرێك كە (سینەمای هۆڵیود)ی بەتەواوەتی گۆڕی، چونكە لە پێش ڕووداوەكان كۆمپانیاكانی بواری فیلم زۆر گرنگیان دەدا بە بە فیلمە پیلانگێڕییەكان (موئامەرەییەكان) ڕوونتر بڵێم ئەو فیلمانەی كە دەستەیەك لەناو حكومەت (موخابراتی) بە مەبەست بێت یاخود نا بۆ مەرام و بەرژەوەندی تایبەتی بێت یاخود بۆ ووڵاتیان، كارەكانیان ئەنجام دەدا، كە لێرەدا دەتوانین دەرهێنەری گەورەی ئینگلیزی ئەلفرێد هیچكۆك ( The Man Who Knew Too Much )بە خاوەن بیرۆكە و سەرقافڵە و یەكەم فیلمی سینەمایی دیاری بكەین كە لە سییەكانی سەدەی ڕابردوو بەرهەمی هێناوە، پاشان تیرۆر كردنی جۆن كەنەدیش وەك واقیع و پیلانگێڕییەك لەنێو حكومەت كرایە بەشێك لەو وێنانەی كە بە فیلمی پیلانگێڕی هەژمار دەكراو چەندین فیلمی لێوە بەرهەم هات لەوانە ( Jfk ) .

ئەوەی جێگەی سەرنجە لە پێش ڕووداوەكانی ١١ی سێپتەمبەر فیلمی پیلانگێڕی هەبووە سەبارەت بە هەردوو هاوشێوەی دوو تاوەری بازرگانی بە ئامانج گیراو لەوانە ( The Long Kiss Goodnight ) .
هەڵبەت ئەم فیلمانە داهاتێكی ئێجگار گەورەیان بۆخۆیان كۆدەكردەوە بە هۆكاری ئەوەی فیلمی بازرگانی و شەعبی بوون ، بەڵام بە بێ ئەوەی زانیاری پێشوەختەیان هەبێت لەسەر ئەم ڕووداوە گەورانە هەر زوو هەموو ئەو فیلمانەی بەرهەمیان هێنابوو بە زیان شكایەوە بەسەر تەواوی سینەمای هۆڵیود و ئیدارەی ئەمریكا !چونكە پاش ڕووداوەكان دانیشتوانی ئەمریكا و تەواوی جیهان هەر زوو بێ بیركردنەوەو شرۆڤە كردن بە كارێكی پیلان بۆ داڕێژراوی خودی 
ئەمریكایان دەزانی هاوشێوەی ئەو ڕووداوانەی كە ڕوویان داوە لە نێو فیلمەكانیان بە درێژایی مێژووی هۆلیود .

هەر لەبەر ئەو هۆكارانە هۆڵیود سیاسەتی كارەكانی گۆڕی و پشتی كردە ئەو بیرۆكانەی بە زیان شكاوەتەوە بەسەریاندا ، بۆیە گەر سەرنج بدەین ئەو فیلمانەی كە تایبەتن بە ترس و شڵەژانی ئاسایشی نیشتمانی ئەمریكا ،بە هیچ شێوەیەك لە دوای ڕووداوەكان ڕەواجی پێنەدراوە و بودجەی زەبەلاحیان بۆ تەرخان نەكراوە ،تەنانەت لە لایەن ڕەخنەگران و دەنگدەران و فێستیڤالەكانیش پشتگوێ خراون  و دابڕاون  لە خەڵاتە سینەماییەكان .