چــیرۆكی ئەو فیلمــەی هەرەشە لە داهاتووی هــەموان دەكات!

2 مانگ پێش ئێستا

شــادمان محەمەد
- لـە چوارچێوەی چیرۆكێكی(زانستی خەیاڵی - ڕۆمانسی)دا كە باس لە ئەگەری روودانی داهاتووی نزیكی مرۆڤایەتی دەكات بەجۆرێك باس لە وابەستەی ژیانی كەسەكان دەكات بە تەكنەلۆژیاوە كە مرۆڤ تێیدا هێندە گیرۆدە و ئالوودەی ئامێرە زیرەكەكانی سەردەم دەبێت كە چیتر نەتوانێت كۆنترۆلی خود وەربگرێتەوە. 
لێرەدا نــوسەرێك كە بەهرەمەندە لە نوسینی (كورتەنامە و چیرۆك)ی نێوان ئاڵوگۆری هەستی مرۆڤەكاندا، بەلام كەسێكی تێكشكاوە بۆیە لە پاش كڕینی سۆفتوێرێكــی نوێ و پێشكەوتوو دەكەوێتە داوی كۆمەڵێك پرسیاری فزووڵی ئامێرەزیرەكەكەوە.
بەهۆی ئەوەی خــودی نوسەر كەسێكی شكستخواردووە بەهۆكاری پەیوەندییەكی ڕابردووی سۆزداریەوە، لەهەمانكاتدا كەسێكی نەرجەسیشە بەهۆیەوە كەمێك گیرۆدەی خەمۆكی بووە، بۆشاییەكی ئێكجار گەورەی لە لایەنی(خۆشەوسیتی و جنس و پەیوەندییە گشتیەكان)ەوە بۆ دروست بووە.
ئەم نوسەرە زۆر گۆشەگیرانە ژیان دەكات، بۆیە كاتێك دەكەوێتە شوێن فزوڵی زیاتری سیستەمە ئەلكترۆنیە نوێیەكەوە لەوێدا بە دەنگی (كچ)ێك ئاشنا دەبێت كە پرۆگرام كراوە، وە بە هۆی بوونی فەراغ و بۆشایی عەشقەوە نوسەر دواتر تەواو دەكەوێتە ژێر ركێفی ئەو دەنگە ئەلكترۆنیە ناوازە نادیارەوە بە جۆرێك بە بێبوونی جەستەیەكی ئامادە هەستەكانی وەك لایەنی( ڕۆحی و جەستەی) بە شێوازی (سێكسی ڤۆیس - سێكسی فۆن) لە ڕێی ئەو بەرنامە زیرەكە پێشەوكەوتووە خاڵی دەكاتەوە.
ئەم فیلمە بینەر دەخاتە بەردەم دووریانێك و ئەگەرێكی چاوەرنكراو نەخوازراوە كە رەنگە هەلبژاردنی یەكێكیان كەمێك ئەستەم بێت، چونكە مرۆڤ لەواقعدا جگە لەوەی كائینێكە ئەگەری تووشبوونی لایەنی شكستی ڕۆحی هەیە، لە هەمانكاتدا رۆژ لە دوای رۆژ بەرەو تەنهایی رەهایی هەنگاو دەنێت، واتا بابەتێكە زۆر كەسی لێ دەرناكات، هەربۆیە كاتێك مرۆڤ دوچاری شكست دەبێت لە ژیانیدا ناچارە بەشوێن (ئەڵتەرناتیڤ- جێگرەوە)ی تری ئەو شكستە رووحیە ومەعنییەوە ببێت.
بە ڕای خۆم چیرۆكی ئەم فیلمە لە ئێستادا لەهەموو كات زیاتر لە ناوماندا دەژی، تەنانەت لە كاتی تەمشاكردنی فیلمەكەدا هەست ئەكەیت خۆت بیت! بۆ نمونە من لە زۆر لایەنەوە خۆمم تێدا بەدیدەكرد، بە باش و خراپییەوە، رەنگە تۆش، وە رەنگە هەموانیش، بەلام هەركاممان بەجۆرێك..
فیلمێكە تەواو پەیوەستە بە مرۆڤە تەنهاكانەوە، یاخود مرۆڤی ئالوودە بەتەكنەلۆژیاوە، لێرەدا مرۆڤ سەرجەم لایەنە ڕۆحی و جەستەیی و فكریەكان فەرامۆش دەكات لە واقعدا لە هەمانكاتدا بۆ رزگاربوون خۆی دەبەستێت بە نیزام و پرۆگرام و بەرمەجەیەكی بێ رووحی كاتیەوە كە لەگەلیدا لە بری باشبوون و رزگاربوون زیاتر نەخۆش و ماندووتری دەكات، یاخود تەنها و گۆشەگیر و خەمۆكتری دەكات .