سارا عومەر لەو دیوی راستییەكاندا

1 مانگ پێش ئێستا

پۆڵا سەعید
كێ توانای بینینی "سارا عومەر"ی لەو دیوی راستییەكاندا هەیە؟ دەشێت لە كوردستاندا بە گشتیی و لە باشووری كوردستاندا بەتایبەتیی هاووڵاتیانی كورد چاویلكەیەكیان لە چاودا بێت، كە بەشێوەیەكی دیكە سارای پێ ببینن. پرسیار لێرەدا ئەوەیە، كە كێ ئەم چاویلكەیەی كردووەتە چاوی خەڵكی؟ سارا خۆی یان خودی هاووڵاتیان خۆیان؟ بۆچی ئەم چاویلكە سیحرییە وەهایكردووە، كە هاووڵاتیان بەبێ ئەوەی رۆمانی مردووشۆریان خوێندبێتەوە پشتگیریی بكەن؟ یان پێناسێكی دیكەی پێدەدەن، كە بەهیچ شێوەیەك هی ئەو رۆمانە نییە.

بۆچیی هاووڵاتیانی كورد، كە رۆمانەكەیان نەخوێندووەتەوە، پێیانوایە، كە هەوێنی رۆمانەكەی سارا كارەساتی هەڵەبجە و ئەنفالە؟ بۆچیی سارا خۆی لە میدیای كوردییدا ئەم بانگەشەیە دەكات و لە میدیای دانماركییدا باس لە كولتوورێكی داعشانەی كورد دەكات بەرانبەر بە كچان و ژنان؟ ئاخۆ گەڕەكی مەڵكەندیی هەناو و مەیدانی كچان و ژنان كووشتنە؟

ئاخۆ شاری سلێمانیی هەناوی كووشتنی كچان و ژنانە و فڕێدانیانە لەو كۆڵانانەدا، بەبێئەوەی مافی ناشتنیشیان هەبێت؟ ئاخۆ هێزی پێشمەرگەی كوردستان هێزی دەستدرێژییكردنە سەر كچان و ژنانی كوردە لە بنكەكانیاندا و پاشان كووشتن و فڕێدانیانە؟ دیارە من هەموو ئەم شیكارییانەم لە كتێبەكەمدا "لەنێوانی راستیی و رقدا كردووە"، بەڵام ئەوەی وەها دەكات، كە من لێرەدا كورتە وتارێك بنووسم، بریتییە لەوەی، كە بۆچی لە ئێستادا شەپۆلێكی رەخنەگرانە لە دانماركدا لە ئارادایە و ساراش بە هەموو هێزی خۆی و دەو‌روپشتیەوە بەگژ ئەم رەخنانەدا دەچێتە‌وە و تەنانەت سارا لە رێگای دادگاوە رێگریی كردووە لەو فیلمە دۆكومێنتارییەی، كە بە نیاز بوو لەسەر خۆی و رۆمانەكەی بەرهەم بێت؟

بۆچی میدیای كوردی لەم هەواڵانەدا بێدەنگی هەڵدەبژێرێت؟ خۆ ئەگەر پێشتر رۆمانەكەی سارایان نەخوێندبێتەوە و بێئاگایانە پشتگیرییان كردبێت، خۆ ئێستا دەتوانن بە تەنگ هەواڵەكانەوە بچن، كە لە میدیای دانماركدا باس دەكرێت. میدیای كوردی بەشێكی گەورەی هەواڵە جیهانییەكان وەردەگێڕێت، كە دەشێت گرنگییەكی وەهاشیان نەبێت بۆ بینەر و خوێنەری كورد، لێ دوورەپەرێز دەوەستن لە نوێتریین هەواڵی سارادا؟