شەش خاڵ سەبارەت بە ناڕەزایی خوێندكاران

24/11/2021

عەزیز ڕەئووف
یەكەم: كورتكردنەوەی ئەم توڕەییە تەنها لە دەرماڵەی خوێندكاراندا كورتبینیەكی گەورەیە. كە زانكۆ ببێتە سەربازگە و مامۆستا و دكتۆر وەك ئەمنی سەردەمی بەعس ڕەفتار بكەن، ئیدی خوێندكار یەك پارچە پڕ دەبێت لە توڕەییەكی گەورە. كە دنیای ئێمە پڕ بێت لە ناعەدالەتی و خوێندكار لەبەردەم ئایندەیەكی تاریك و نادیاردابوو، ئیدی هەركردەیەكی ناڕەزایی و هەر قیژە و هەر توندوتیژییەكی ڕادیكاڵ دەبێتە ئەرك و پێویستی.

دووەم: ئەو دیدە كورتبین بوو كە پێی وایە ئەم نەوەیە ناتوانێ ڕیسك بكات. ئەو نەوەیەی كە دنیایەك ناشرینی لەبەردەمیدا ڕوودەدات و بێدەنگە و هەمیشە پێی وابوو كە ئەم نەوەیە كارەساتە و نەوەی ئایپاد و تەكنەلۆژیایە و ناتوانێ هیچ بكات دیدێكی تەواو كورتبین و ناڕاست بوو. ئەوەی ئەم نەوەیە لەم چەند ڕۆژەدا ئەنجامیاندا ڕەمزە بۆ ئازایی و جەربەزەیی و زاڵبوون بەسەر مەحاڵدا.

سێیەم: خەونی ئەم نەوەیە تەواو جیاوازە لە خەون و كردەی هێزە سیاسیەكان. بێدەنگی كۆی هێزەكانی دەرەوەی دەسەڵات تا ڕوودانی خۆپیشاندان و ناڕەزاییەكان و دواتر خۆخستە ڕیزەكانیانەوە، قیزەونترین كردەی ئەم گروپانەیە و ئەسڵەن تێنەگەیشتنە لە خەون و خولیا و برینەكانیان. ئەم هەموو كۆنگرە ڕۆژنامەنوسی و بڵاوكردنەوەی بەیان لەلایەن هێزەكانەوە ئەسڵەن جۆرێكە لە فێڵ و نەوەی ئێمە لە ئێستادا لەم فێڵ و تەڵەكەبازیەی سیاسیەكان گەیشتوون، هەر بۆیە بایكۆتی هەڵبژادنەكان دەكەن و لەسەدا حەفتا بەرەوژووری دەنگدەری ئێمە چاوەڕێی سندوقی دەنگدان نیە بۆ هاتنەدی خەون و خولیاكانی.

چوارەم: خەمی هاوبەش پێویستە. كە مامۆستا ناڕازی بوو خوێندكار بێدەنگ، كە كارمەند ناڕازی بوو ئەوانی تر بێدەنگ، كە سایەق تەكسی ناڕازی بوو كۆی كۆمەڵگە بێدەنگ، ئەم پەرتپەرتبوون و لاموبالاتی و نەبینینی برینەكانی ئەوی تر دەستی هەیە لە زوو دامركانەوەی كۆی ناڕەزایی و توڕەییەكان و زوو سەركوتكردنی لەلایەن هێزەكانەوە و ئاساییكردنەوەی دۆخەكە بۆ دەسەڵات دەبێتە كردەیەكی تەواو ئاسان.

پێنجەم: بكوژ و تەقەكەرانی حەڤدەی شوبات و ناڕەزاییەكانی ساڵی پار لەبەردەممان پیاسە دەكەن كەچی توشی شۆك بووین بە شەقی چەتەیەك لە سەری خوێندكارێك. دەبێ تاوانەكان لە زاكیرەماندا بمێننەوە نەك كامێرا و گرتەی ڕووداوێك توشی شۆكمان بكات. دە ساڵی ڕابردووی ئێمە پڕە لە تاوان و كوشتن و ڕژانی خوێنی گەنجەكان، توشی شۆكبوونمان بەوەی كە چەتەیەك شەق لە خوێندكار دەدا و هێشتا چاوەڕوانی ئەوە بین كە شەقوەشێن شەق نەهاوێ، گەڕانەوەیە بۆ خاڵی سەرەتا و بەخشینی چانسی تری مانەوەیە بۆ چەتەكان.

شەشەم: دوكەڵی ژێر وێنەكەی تاڵەبانی پێمان دەڵێ چیرۆكی بەناو شۆڕشگێڕەكان تەواو بووە، ئێمە لەبەردەم حیكایەتێكی ترداین، حیكایەتی نەوەیەك كە هیچی نیە بیدۆڕێنێ و پشت دەكاتە كۆی ئەو چیرۆك و حیكایەتە دووبارە و ناشرینانەی كە لە سی ساڵی ڕابردوودا دەوترێنەوە و توانای ڕازیكردنی ئەم نەوەیەی نیە.