سەردەمی دابەش بوونی چینەكانی كۆمەڵگایە...

25/11/2021

ڕەمزی سەعید 
دابەشبوونی چینەكانی كۆمەڵگا چییە؟
ئەگەر سەرنج بدەینە كۆمەڵگا، خەڵك بە پێی داهات و سامان و پیشە و دۆخ و فاكتەری هاوشێوە دابەش دەكرێن و پۆلێن دەكرێن بۆ گرووپە جیاوازەكان ئەمە بە چینە كۆمەڵایەتییەكان ناسراوە بەپێی سامان و پیشە، پێگەی تاكێكی دیاریكراو لە چینی كۆمەڵایەتیدا دانراوە چینە كۆمەڵایەتیەكان لە هەموو كۆمەڵگاكان دەبینرێن چ كۆمەڵگایەكی زۆر مۆدێرن بێت یان كۆمەڵگایەكی تری نەریتی بەڵام زیاتر لە ووڵاتە نەریتەكان و دواكەوتووەكان سنووری بەزاندووە، زۆر باوە بەهۆی قۆرخكاری سیاسی . ئەمەش لە ئەنجامی نایەكسانییە لە سیستەمی حكومڕانی سیاسی و ئیدارەی هەر  ووڵاتێك و حزبێكە لەناوخۆدا ...

ئەگەر باسی ئەم سیستەمە حكومڕانیە لە هەرێمی كوردستاندا بكەین، لە ئاستی حزبی و حكومی، بە پلان و بەرنامە دژی خەڵكی ناوەند و هەژار و هەروەها چینی ڕۆشنبیر و خاوەن شەهادەیە.

رۆژانە بەرەیەكەووتن ڕوودەدات لە نێوان دەسەڵاتی سیاسی و ئەم چینە بێ دەسەڵاتە كە پێكهاتووە لە خەڵكی هەژارو كەمدەرامەت. كە لە ناو دەزگاكانی حكومەت و ئۆرگانەكانی حیزب، كە لە لایەن كەمینەیەكی دەست ڕۆشتووە وە قۆرخ كراوە و كە ئیش و كاری چینە بێ دەسەڵاتەكان زۆر بە بێ گوێیانەو بە سستیی بەرێ دەكەن. ئەگەر واستە و بەرژەوەندیان نەبێت لەگەڵ یەكتری كارەكانت هەر ناڕوات ، بەڵگە زۆر زۆرە، وەك ئەو ووتەیە كە دەلێت:
 (مانگ دیار بێت پێویست ناكات دەستی بۆ رابكێشرێت)

ڕاستی نەك گوێ لەم چینە بێ دەسەڵاتە ناگرن بەڵكو ئەو پەڕی رووبەڕووی سوكایەتی و پێ ڕابواردن دەبنەوە لە لایەن چینی دەست ڕۆشتووە وە ، كە ئەمە كارەساتێكە دەشێت ڕووبدات لە ئایندە تەڕ ووشك بەیەكەوە بسوتێنێت، وە پەل بهاوێژێت بەرە و توندوتیژی و ماڵوێرانی ناوماڵی كورد و ئیدارەی حكومەت و حزبەكانیش،

ئەگەر لایەنی پەیوەندیداری ئەم پۆستە بەهەند وەربگرە و بگەیەنە بە سەرەوە ، چونكە هەموو تاكێكی ئەم هەرێمە ئەو ڕاستییە دەزانێت، بۆیە بە دژی خۆت و سەرەوەت مەزانە، بەڵكو بەرزی بكەرەوە وەك هۆشداریەك، چونكە لەڕابردوودا گرتنی مامۆستا و رۆژنامەنووسان و بایكۆتی هەڵبژاردنەكان و كۆچی گەنجان و لاوان و ئێستاش خۆپیشاندانەكان بە ڵگەی ڕوونن كە جیاوازی چینایەتی و ناعەدالەتی و غەدر زۆر بووە ...