دەربارەی چەمكی: بڕیاری پێشەكیدراو

1 مانگ پێش ئێستا

مامۆستا جەعفەر
بڕیاری پێشەكیدراو: چەمكێكی سیاسی و كۆمەڵایتیە نوێیە، مەبەست لێی ئەو بڕیارانەیە، بەبێ لێكدانەوە و لێپێچینەوە و شیكاری دەدرێت لە زمانی ئینگلیزی دا پێی دەگوترێتpre, judgmen لە زمانی ئەڵمانیش پێی دەگوترێت : Vorurteile تۆ حوكمێك دەدەیت، هەر لە بەر ئەوەی لە كەسێكی هاوبیر و هاوتێگەیشتنی خۆت بیستووتە: رۆستەم نێر نییە، ئیدی تۆش لە هەموو شوێنێكدا نیشانەی پرسیار دەخەیتە سەر نێرایەتی رۆستەمی زاڵ!

بڕیارەكە لەناو كۆڕ و كۆمەڵ پێشەكی ئامادەكراوە، بەبێ گەڕانەوە بۆ ئەقڵ و مەنتق و لۆژیك . هەر بۆ نمونە: لەسەردەمی نازییەكاندا هەموو ”جوو” ەكان بە ” تاوانبار ” و شایانی كوشتن و لەناوبردن دادەنران، بەبێ ئەوەی شتێكیان كردبێت، كە بۆنی خیانەت و ناپاكی لێوە بێت ..

لای خۆشمان خەڵك لەسەر بنەمای سۆز، خەڵك حوكمێكی كوێرانە دەدات، لەبەر ئەوەی كەسێكی خۆشدەوێت یان كەسێكی خۆشناوێت، ئێدی شمشێری حوكمی ناڕەوا ملان دەپەڕێنێت..

بڕیاری پێشەكیدراو ، هەمیشە لە بۆسەدایە بەرانبەر هەندێ كەس و دەستە. ئەو كەسە گوتی: ماست سپییە! هەزاران كەس سوێند دەخۆن ماستی سپی لە هیچ شوێنێك بەرچاو ناكەوێت! كێشەكە پەیوەندی بە پەیكەری راستی و ناڕاستیەوە نییە. گروپی بڕیاریپێشەكیدراو كەمینی چڕی بۆ گروپ و كەسی بەرانبەر داناوە.

هەرچۆنێك ببزوێت، لە هەر چوار لاوە ئاگر باران دەكرێت.ناوڕۆك و فەلسەفەی گوتار و لێدوانەكە لە تای تەرازوو دانانرێت.ئەو كەسە ناوی (ا) یان (ب) یە، سەر بەكام گروپە !

جارێكیان مەلا بەختیار لە گفتۆگۆیەكی تلیفزیۆنیدا گوتبوی : لە گوندێك بوین (٢٢) هەلیكۆپتەر پەلاماری داین. هەڵایەك دروست بوو، تا ئەمڕۆش وەكو بنێشتە خۆشەی لێ هاتووە. مەلا بەختیار باسی ئەفغانستانیش بكات، بەری ئەو دیوی چەند كۆمێنتەكی سارد و سڕ دەنووسن. 
من لەچەند گفتۆگۆیەكی تلیفزیۆنی و لە كتێبی (بە خەونی گەورەوە كەوتینە رێ ) باسی شەڕی میریاسی خوارووم كردووە، كە لە 2/3/1978 روویداوە و ناوی زۆربەی ئەو پێشمەرگانەم نووسیووە، كە لە شەڕەكەدا بەشدار بوون وەكو: ئازادی سەگرمە، دلێری سەید مەجید، سامان گەرمیانی، ئاوات قارەمانی، فەرید ئەسەسەرد، ...تاد. من ئەو چركەیە، لەبناری شاخی زەردەدا بووم . پێشمەرگەكان (٣٥) هەلیكۆپتەریان بە ئاسمانەوە ژمارد.

كەس نیشانەی پرسیاری نەخستە سەر لێدوانەكەی من وكەسیش داوای بەڵگە و شایەتی لێ نەكردم. كەواتە: بابەت و راستی و رووداو لای ئەو گروپە گرنگ نییە .
كێ ئەو وشەیە لە زاری دەرچوو؟ ئەم گێڕانەوەیە خزمەتی پڕۆژەی لێدان و ناوزڕاندن دەكات؟  

كەسێك بتوانێ سەرجەم ئەو (٣٥) فڕۆكەوانە لە تەلاری هونەر كۆبكاتەوە، بە مەرجێ ئەو كەسانە لە گروپی بڕیاری پێشەكیدراو بن، هەموویان شایەتی بدەن: سوێند دەخۆین: بەڵێ رۆژی ١٩٧٨/٣/٢ ئێمە پەلاماری پێشمەرگەكانی قەرەداخمان دا. 
نە قسەی ئەم (٣٥) فڕۆكەوانە و نە قسەی سەد جووتیاری قەرەداخ و بەڵگەكانی سوپای عێراق كاریگەریان لەسەر ئاسۆی بیركردنەوەی ئەو گروپە دەبێت....

لە ئۆروپای ئەمڕۆ دا، گروپی راسیست (رەگەزپەرست) هەن، ئەوان هەموو قژڕەشێك بە بێ ئەقڵ، گەمژە، نەزان و گومانلێكراو تێدەگەن. ئەمە هەمووی پەیوەندی بە ئاستی فەرهەنگی و كولتورییەوە هەیە و رەنگە ئەو كەسانە نەتوانن لە نیوان قژڕەش و قژڕەشێكیتر جیاوازی بكەن. ئەمانە بە یەك شانە سەرەكان دادەهێنن و هەموویان یەك چاویلكەی رەش لە چاو دەكەن!

بڕیارەكە بڕیارێكە و پێشەكی دراوە!