ئازادیی و جەللادەكانی

1 مانگ پێش ئێستا

ئارام قادر حەمەسور
بەردەوام قەڵەم و دەسەڵاتی سیاسیی ستەمكار و جەللادەكانی ڕووبەڕووی یەكتر دەبنەوە، بەردەوام دوژمنایەتی یەكتر دەكەن، چونكە عەقڵی قەڵەم و عەقڵی چەك ناكۆكن بەیەكتر، هێزێك عەقڵێكی چەكداری هەبێت ڕێزی قەڵەم نازانێت، هێزێك كەلـلەیەكی ڕەقی هەبێت كوا هێزی نەرم دەناسێت؟ جەللادەكانی ستەمكار لە دوونیا هەموویان ڕقیان لە قەڵەم و ئازادیخوازانە، لەكوێ هەبووە ستەمكار باوەشی بۆ قەڵەمە ئازا و ئازادەكان كردبێتەوە؟ جگە لە قەڵەمفرۆش و ڕانتخۆرەكان و هاوئاوازەكانی ستەمكارەكان.

لە كوێ قەڵەمەكان كەوتنە سەما بۆ جەللادەكان لەوێش ئازادی لە گۆڕنراوە، لە كوێش قەڵەمەئازادەكان دژایەتییان كراو لێیاندراو كوژران بزانن هەناسەی قەڵەمە ئازاكان بەردەوامە، چونكە كاری قەڵەمە ئازادەكان ڕەخنەكردنی دەسەڵاتی ستەمكار و مافیاكڕاتییە. دەسەڵاتە كلیپتۆكراسییەكان بەردەوام قەڵەمەئازادەكانییان بە دووژمنی پلە یەك داناوە، بەردەوام خەریكی شكاندن و بوختانن بۆ قەڵەم بەدەستەكان.

گۆبلز وەزیری پڕوپاگەندەی هیتلەر بەردەوام دەیگوت؛ سەرۆك هیتلەر هەر كاتێك گوێم لە وشەی ڕۆشنبیر دەبێت دەست بۆ دەمانچەكەم دەبەم. ڕۆشنبیر گەر ئازاو ئازاد نەبێت قەڵەمەكەی،  ئەوكات دەبێتە چەكێكی حەساری دەسەڵات.
 بەردەوام ڕانتخۆرەكان و ڕاگەیاندنكارەكان و نوسەران و ڕۆشنبیران بە نزیك بوونەوەیان لە بەرداخە ئاوەكەی دەسەڵات وەك شەكر دەتوێنەوە و نامێنن.

ڤیدڵ كاسترۆش بەردەوام لە جیڕەی قەڵەمی نوسەران دەترسا. قەڵەم و دەسەڵات بەریەكتر دەكەون، بۆیە بەزەحمەت نووسەرە ئازادەكان دەتوانن لە وڵاتی خۆیان بژین، ناچارن لە دەرەوە ڕەخنەكانیان ئاڕاستەی كەلـلەوشكەكەی دەسەڵات بكەن.

دەسەڵاتیی كوردی سی ساڵە نەیتوانیوە سیستەمێكی سیاسی گونجاو دروست بكات، نەیتوانیوە كەرامەتی مرۆڤ بپارێزێت، بەردەوام قەڵەمە ئازادەكانی ترساندووە یان تیرۆركردووە.
 بەڵام قەڵەمەئازادەكان هەر زیاتر دەبن و ئێستاش لێدان و هەڕەشە لە نوسەران درێژكراوەی سیستەمە ستەمكارەكەیە، كاری ڕۆشنبیران بەرهەم هێنانی مەعریفەیە، كاریان ڕەخنەی ناشیرینیەكانی دەسەڵاتە، نەك گەرمكردنی دیوەخان و پیاداهەڵدانی بەرپرسە تەجمیلكراوەكان، قەڵەمی ئازا نابێتە دەروێشی سیاسیەكان، نابێت بێدەنگبێت چونكە بێدەنگی كاری ڕۆشنبیران و نووسەران نیە وەك ئۆجەلان دەڵێت.

كاوێژكردن كاری قەڵەمە فاشیلەكان و عەقڵ دۆگماو نەوتاوییەكانە، ئەوان دۆڕاون ناتوانن بڵێن و بنووسن بۆ خەڵك، بۆیە چەك دەبێتە ناسنامەیان، ئەمە گاڵتەجاڕی عەقڵی ستەمكارانە.
 ئەم شەڕەی قەڵەم و چەك بەردەوام دەبێت هەمیشە خەتی ئازادی و خەتی ستەمكاری تۆختر دەكاتەوە، هەمیشە ناشیرینیەكانی دەسەڵاتی تەجمیلكراو لەبەردەم خۆری قەڵەمە ئازادەكان توختر دەبێت، هەمیشە قەڵەم ماسكە ناشیرین و گاڵتەجاڕ و خەڵەتێنەرەكان كەشف دەكات، بۆیە هەمیشە ستەمكاران دۆژمنی قەڵەمی ئازاو ئازادن. هەمیشە خەم و كۆژان و كۆشادی خەڵك دەبێتە مەرەكەبی قەڵەمە ئازاو ئازادەكان، هەمیشە چەتەگەریی و خیانەت و نەوتخۆری و ستەمكاریی و نادیموكراسی بونەتە فیشەكی چەكەكەی دەسەڵاتی ستەمكار. بەڵام تا ستەمكاریی هەبێت قەڵەمە ئازادەكان هەر دەبن. ئەم سیاسەتی ترساندن و لێدانی دەنگە ئازادەكان لە ئێستادا پێماندەڵێت دەسەڵات تائێستاش زۆر ستەمكارە، قەڵەم فرۆشەكانی حەساری دەسەڵات ڕۆژێك دێت ئاواببن، چونكە بوونەتە ڕۆبۆتی جەللادەكان.

سۆرانی مامەحەمە و كاوە گەرمیانی و سەردەشت عوسمان بەقەڵەمەكەیان ماسكەكانی دەسەڵاتییان هەڵدەدایەوە، پاشان تیرۆركران و چەكبەدەستەكان مێژووی خۆیان ڕەشتر كرد.