فەیسبوك ماڵێك بۆ سایكۆپاتەكان - 3

4 مانگ پێش ئێستا

ئارام سەعید
بەشی سێهەم 
 زانكۆی ئۆهایۆی ئەمریكی لەلێكۆڵینەوەیەكدا كە جێسی فۆكس ئەنجامیداوە، ئاشكرای كردوە بەكارهێنانی خراپی وێنەی سێڵفی نیشانەی كەسیتی سایكۆپاتە، بێگومان زۆركەس سێلفی دەگرێت بەڵام زانكۆكە بڵاوی كردۆتەوە كە بەكارهێنانەكەی هەندێك جار نیشانەی نەخۆشیی دەرونییە بەتایبەتی ئەو پیاوانەی وینەی زۆری سێڵفی بڵاودەكەنەوەو كاتێكی زۆر تەرخان دەكەن بۆ گرتنی و چاككردنی وێنەكان، ئەوانە نەرجسیەتیان بەرزە كەئەمەش شتێكی نوێیە لەو لێكۆڵینەوەیەدا. ئەو مامۆستایەی كە سەرپەرشتی لێكۆڵینەوەكەی كردوە دەڵێت" ئەوەی زۆر مایەی سەرنجە ئەو بەكارهێنەرانە بەشێكیان ئەوانەن كە زۆر دژی كۆمەڵگان و دەكرێت بڵێین سایكۆپاتن" چونكە زۆر گرنگی بە بەرجەستە كردنی خۆیان دەدەن.. 

ئەم لیكۆڵینەوەیە لەسەر كۆمەڵیك پیاو كراوە لە تەمەنی ١٨ بۆ ٤٠ ساڵ، دەكرێت بڵیین كاتێك لەدیمەنێكی جواندا وینەیەكی سێڵفی خۆت دەگریت ئەوە ناتكاتە سایكۆپات بەڵام دەكرێت ئەوانەی زۆر سێڵفی دەگرن و بەكاری دەهێنن زیاتر حەز بە بەرجەستەكردنی خۆیان دەكەن و رەنگە سیفاتی تێكچونی باری دەرونیان تیابێت...

ئەمیلی یوفی كەنوسەرێكە لە سایتێكی بەناوبانگ نوسیویەتی ئەگەر بڕیارە كەسێك ببینیت و ئەو كەسە لەسەر فەیسبوك پرۆفایلی نیە ئەبێت گومان بكەیت، چونكە ئەوەی نەیەوێت لەسەر سۆشیاڵ میدیا دەربكەوێت و خۆی بشاریتەوە بۆتە شتێكی نەخوازراو... بێگومان مەبەستی ئەوانە نیە كەتەمەنێكیان بەسەربردوە و سۆشیاڵ میدیا زۆر دوای گەنجێتی ئەوان هاتوە. دیارە پێچەوانەی ئەم بۆچونەش ئەوانەن كە دژی سۆشیاڵ میدیان و پێیان وایە سۆشیال میدیا خۆی دەمانكاتە سایكۆپات، مادلێن رایان یەكێكە لەو  نوسەرانەی پێێ وایە كە تۆڕە كۆمەڵایەتیەكان خۆی سایكۆپاتە و نوسیویەتی" فەیسبوك منی كردە خراپترین كۆپی خۆم", بەهۆكاریكی گەورەی خەمۆكی دەزانێت بۆ مرۆڤی هاوچەرخ. 

لەناو سێكوچكەی تاریكدا سایكۆپاتەكان لەهەمویان ترسناكترن چونكە هەرگیز پەشیمانیان تیدا نیە و هەر خەریكی خۆنانەوەن بۆ ئەوانی تر و تەنگ هەڵچنین بە هاوڕیكانیان.. هیچ كات خۆیان بە بەرپرسیار نازانن لەئازاردانی ئەوانی تر.
ئەوەی زیاتر سایكۆپاتەكان ئاشكرا دەكات نوسین و كۆمێنتەكانیانە بۆ ئەوانی تر، بەنمونە نوسینی هەڕەشە، كۆمێنتی جنێو و سوكایەتیكردن بەوانی تر، لەو سیفەتانەن كە سایكۆپاتەكانی پێ دەناسرێنەوە، دەنا دەستنیشانكردنی زانستیی كەسی سایكۆپات كاری پسپۆڕانی كلینیكی دەرونزانیە بە بینین و پشكنین بۆیان ئاشكرا دەبێت. 
هەندێك جار هەواڵێك دەبیستین كە كەسێك ژمارەیەكی زۆر خەڵكی هەڵخەڵەتاندوە، یەكسەر ئەو پرسیارەمان لادروست دەبێت، چۆن ئەبێت كەسێك هێندە بێویژدان بێت و ئازاری ئەوهەموو خەڵكە بدات و فێڵیان لێ بكات؟ وەڵامەكەی ئاسانە، كەسی سایكۆپات بەلایەوە گرنگ نیە خەڵك ئازار بچێژێت، چونكە خۆیان سودمەند بوون، ئەوان ویژدان و سۆزداریان نیە، ئەوەی دەیانەوێت ئەوەیە كۆنترۆڵی چواردەوریان بكەن، بۆئەوەش ئەوەی پێویست بكات دەیكەن نەك ئەوەی راستە یان هەڵەیە! هەربۆیە هەندێك لە سایكۆپاتەكان پێویستیان بەبەكارهێنانی توندوتیژی نیە بۆ دەستكەوتەكانیان، بەڵكو بەفێڵ و فریودان دەیكەن، زۆر جار لەڕێگەی تۆڕە كۆمەڵایەتیەكانەوە ئەوكارانە دەكەن، ئەوەش هێندە بە پلان دەكەن ئاشكرابونیان كاتێكی زۆری دەوێت، چونكە لەسەرەتادا وەك كەسێكی خۆشەویست خۆیان دەردەخەن و ئەو توانایەشیان هەیە، دواتر ئاشكرا دەبن بەتایبەتی كە فێڵەكانیان ئاشكرا دەبێت ئەوكات توڕەیی وهەڕەشەكانیان دەردەكەوێت.

 لەراستیدا مەرج نیە سایكۆپاتەكان هەمویان پیاوكوژبن و لەزیندانەكاندا بن یان ئەنجامدەری تاوانی گەورەبن، بەپێچەوانەی هەندێك بۆچونی باوەوە، چونكە جورئەتیان زۆرە وسڵ ناكەنەوە و ترسیان نیە، لەهیچ ناگەڕێنەوە ، ئەوە كۆمەڵە خاڵێكی سەرەكیە كەهەندێكیان ئەو هەڵسوكەوتانەیان بەخەرج دەدەن بۆ سەركەوتنیان لەرووی پیشەییەوە، كە دەبێتە سەركەوتنی هەندێكیان بۆ پۆستی گەورەی ئیداری و سیاسی و بزنزمانی بەتوانا، هونەرمەند، پارێزەر یان وەرزشەوان بەتایبەتی ئەو وەرزشانەی ریسكی زۆری تێدایە...كەواتە ئەوبۆچونە راست نیە كە سایكۆپاتەكان هەمویان ئاشكرابن ولەكونجی زینداندا بن، رەنگە رۆژانە لەسەر تۆڕە كۆمەڵایەتیەكان بیان بینین و نەزانین.   

لە كۆتاییدا كارێكی سەختە مرۆڤ تۆڕێكی كۆمەڵایەتی جێبهێڵێت كە تەمەنێكی درێژی لەژیانت ئەرشیفكردوە، پەیوەندی بەردەوامی بۆ دروستكردووی بەوكەسانەی جێی گرنگین بۆت، هەرچەندە هەندێك لە پەیج و ئەكاونتەكان و گفتوگۆكان بێزارمان دەكەن و هەست دەكەین نیگەرانمان دەكەن، بەوانەشەوە هێشتا ئارەزویەكمان هەیە بۆبەردەوامیی،  تا لەكۆمەڵگا و دۆخەكەی تێ بگەین. بەڵام گرنگە نەبیتە قوربانی و نێچیری كەسی سایكۆپات، بەهێمنی لە هاوڕێیەتی بكشێرەوە. فەیسبوك ئامرازێكی جوانە بۆ پەیوەندیكردن و یەكترناسین، بێگومان بۆدەستنیشانكردنی نەخۆشیەكان كارێكی قورسە، باشترین شت ئەوەیە بەوریاییەوە هاوڕێەتی بكرێت لە فەیسبوكدا.