لە جوغزی دووفاقی هاووڵاتیانەوە !

4 مانگ پێش ئێستا

شەماڵ عادل سەلیم
بەهۆی بەفر بارین ونزم بوونەوەی پلەی گەرما بە رێژەیەكی بەرچاو، بەڕێوەبەرایەتی هاتوچۆی شارەكانی هەرێمی بەتەمای اللە، ئاگاداری هاووڵاتیان و شۆفێران دەكاتەوە كە شەقامەكانی ناوشارو دەرەوەی شار بەستەڵەكن و مەترسی روداوی هاتوچۆیان هەیە. هەروەها داوایش لە شۆفێران دەكەن كە  بە هیچ جۆرێك لە ماڵەكانیان نەیەنە دەرەوە و شۆفێری نەكەن بۆ ئەوەی لە روداو و كارەساتی هاتوچۆ پارێزراو بن.

بەڵام ئەوەی سەیروسەمەرەیە و بۆ من پرسیارێكی بەئازارە ئەوەیە :
هاووڵاتیانی هەرێم لە دەست بێ مووچەیی، بێ نەفتی، بێ غازی، بێ كارەبایی، بێ ئیشی، بێ ئاویی و چەندین (بێ) ی زەبەلەحی دیكە دەناڵێنن، كەچی بەشی زۆری ئەوانەی هەمیشە ڕەخنەدەگرن و باسی نەبوونی  موچەو خزمەتگوزاریی و ناعەدالەتی دەكەن، زۆر رۆمانسیانە لەناو بەفر خەریكی وێنەگرتن و شەڕە بەفرو نووسینی شیعری ڕۆمانسین، لەو كاتەی دەبوایە لەشەقام بن و پر بەقورگی خۆیان داوای سادەترین مافەكانی خۆیان بكەن .

ئای لەوە، تەنها لە هەولێركە ٤ سم بەفر باریوە، زیاتر لە ٥٠ هاووڵاتی بەهۆی بەفرەوە دەست و قاچیان شكاوە، لەگەڵ ئەویش  لە شایی و هەڵپەركێی نێو بەفرو نێرگیلە كێشان نەكەوتوون، هەروەك ئەوەی نەبایان دیبێت نەباران ؟

ئاخر هاووڵاتی بەرێز، جەنابت دینارێكت لە گیرفان نییە، لە خانویەكی كرێی ساردوو بێ نەوت وكارەبا ژیانێكی كۆڵەمەرگی بەسەر دەبەیت و هەررۆژێكت مردنێكە، پێم ناڵێت ئەو بەفرە لە ماڵوێرانی زیاتر چیدیكەی لەگەڵ خۆی بۆت هێناوە ؟

من لەوە باش تێدەگەم كە بەفر بۆ بەرپرسە  پۆشتەكانمان  نیعمەتە، ئەوان لە قەسرێكی شاهانەی گەرم دەژین، كە دەچنە دەرەوەش باشترین پۆشاكی فەرەنسی و ئەمریكی و بەریتانی دەپۆشن، بە سودترین خوراك دەنۆشن، ئاوو كارەبایان فولە، شەق لە دۆلار دەدەن !

بەڵام ئەوی لێی حاڵی نابم، زەماوەندی هاووڵاتیانی بێدەرامەت و بێ خزمەتگوزاری نێو بەفرە، ئەو هاووڵاتیانەی عەیامێكە مردوون ونانی زیندووان دەخۆن !