كچە "نینجاكانی" پێنجوێن

4 مانگ پێش ئێستا

راپۆرتی: نەوژین - هۆزان فەریق
سێ ساڵە (شاهان) دەستی بۆ وەرزشێك بردوە كەلەناو كۆمەڵگادا نامۆیە بۆ كچ، ئەویش هونەری بەرگرییە، لەنێو ئەو هونەرەشدا، رێچكەی نینجای گرتوە، كە وەرزشێكی پڕ جوڵەیە، ئەو ئێستا بە شانازیەوە ئەندامی گروپی نینجاكانی پێنجوێنە.
 ساڵی 2017 فێرگەی نینجا لەقەزای پێنجوێن (كە نزیكەی 100كم لە ناوەندی شاری سلێمانیەوە دورە) كراوەتەوە، سەرەتا تایبەت بوە بۆ كوڕان، پاش ساڵێك بەشی كچانیشی تێدا كراوەتەوە، ئێستا 25 كچ لەفێرگەكەدا راهێنان دەكەن.
رێبەند حەمەكەریم، راهێنەری فێرگەی نینجای پێنجوێن، بۆ نەوژین وتی: ئامانجمان تەنها خزمەتكردنە بە بواری وەرزش و بەرەوپێشبردنی، بۆیە ئەم فێرگەیەمان كردەوە و هەوڵیشمانداوە وەكو یەك سود بە هەردو رەگەز بگەیەنین.


 رێبەند سەرەتای دانانی فێرگەكەیان بەئەستەم ناودەبات "كارەكە لەسەرەتاوە كەمێك سەخت بو، بەڵام سوپاس بۆخوا كۆڵمان نەدا و نەكەوتین، توانیمان ببینە جێگای متمانەی كۆمەڵگا".
لە كوردستاندا بە كەمی كچان لە بواری وەرزشەكانی بەرگری دەبینرێن، هەربۆیە دیمەنەكە زیاتر نامۆ دەبێت كە كچان رو لەم وەرزشە پڕ جوڵەیە بكەن.
ئاسیا كەریم، 18 ساڵ، یەكێكە لە یاریزانە كچەكانی گروپی نینجا، وتی: سەرەتا راهێنانەكان بۆ من وەكو كچێك زەحمەت بو، بەڵام هەوڵدانی خۆم و پشتیوانی راهێنەرەكەم، گەیاندمیە ئاستێكی بەرزتر.
شاهان عەلی، 15 ساڵ، یاریزانێكی تری نینجایە، جەخت لە سەختی وەرزشەكەیان دەكاتەوە "نینجا جیاواز لە هونەرەكانی تر سەختە، بۆیە پێویستی بە هەوڵدانێكی زۆرە بۆ ئەوەی جەستەیەكی بەهێز بونیاد بنێیت".

 
بەردەوام لە تێكەڵبونی كچان بە وەرزش، هۆكاری كۆمەڵایەتی و رێگری خێزانەكان، بە ئاستەنگ دەزانرێت.
شاهان لەوبارەوە دەڵێت: "لەبەر ئەوەی حەزێكی زۆرم بۆ وەرزشەكە هەیە، خێزانەكەم هاوكارێكی باشم دەكەن".
كچانی نینجای پێنجوێن، باس لەوەدەكەن ئەم وەرزشە نەك هەر تەنها لە روی جەستەییەوە، بەڵكو لە روی دەرونیشەوە ئارامی پێداون.

 
شاریا تاهیر، 16 ساڵ، یاریزانێكی گروپی نینجایە و دەڵێت: لە روی جەستەیی و دەرونییەوە سودی پێ گەیاندوم، ئێستادا جیاواز لە پێشتر لە كەسێكی گۆشەگیرەوە بوم بە كەسێكی كۆمەڵایەتی".
نینجا دەستەواژەیەكی ژاپۆنیە و بە ژمارەیەك گروپی شەڕكەر دەوترا كە لە سەدەی 15ی زاینیەوە لەو وڵاتە سەریان هەڵدا، كە هونەرەكانی بەرگری و شمشێربازییان تێكەڵ كردوە و لە سەرەتاوە لە شەڕ و تیرۆر و تاڵانكردن گلاون، پاشان رێبازێكی دیكەی گرت و ئێستا لە جیهاندا پەیڕەوكارانی وەكو وەرزشێك ئەنجامی دەدەن و لە زۆر وڵاتدا هەن، بەڵام لە كوردستاندا رەنگە گروپەكەی پێنجوێن سەرەتای ئەم هونەرە بێت.
رێبەند، گەشبینە بە بە بڵاوبونەوەی زیاتری ئەم هونەرە و هیواخوازە رۆژێك بتوانن بەشداری پاڵەوانێتیەكان بكەن.