گۆڕانەكانی پێست لە كاتی دووگیانیدا

08/05/2022

د. شادیار حەمەلاو
یەكەم: پەڵەی ڕوخسار ( میلازما)
ئەگەر لە كاتی دووگیانیدا ڕوخسارت پەڵەی قاوەیی تیا دەركەوت ئەوە توشی حاڵەتێك بوویت پێی دەوترێ میلازما.
بۆچی توشی ئەم حاڵەتە دەبیت؟ 
زۆرێك (70%) لە ئافرەتانی دووگیان توشی ڕێژەیەك لە پەڵەی ڕوخسار دەبن كە هۆیەكەی زیاد دەردانێ میلانین ە، میلانین ئەو ماددەیەیە كە ڕەنگ بە پێست دەدات، ئەگەر زیاد لە پێویست دەردرا ئەوە توشی پەڵەی ڕوخسار دەبیت. 
هۆیەكەی بە تەواوی نەزانراوە بەڵام هەندێ سەرچاوە دەڵێن پێدەچێت بە هۆی گۆڕانكاریی هۆڕمۆنی كاتی دوگیانییەوە بێت.
چی بكەیت باشە؟ 
1-باشترین كار ئەوەیە سەردانی پزیشكی پسپۆری پێست بكەیت و لەخۆتەوە هیچ بەرهەم و كرێمێك بەكارنەهێنیت 
2-ئەوەی كە پێشنیار دەكەین بۆت بەكارهێنانی دژەخۆرە كە چارەسەری ناكات بەڵام ڕێگری لە خراپتربوونی پەڵەكان دەكات 
3-خۆت بپارێزە لە هەڵمی گەرم و وشككەرەوەی قژ و هەر سەرچاوەیەكی ڕاستەوخۆی گەرمی كە لەوانەیە پەڵەكان خراپتر بكەن 
4-مەترسە، چونكە زۆربەی كاتەكان دوای لە دایكبوونی كۆرپەكەت پەڵەكان كاڵدەبنەوە و نامێنێن هەرچەنە هەندێ لە خانمان ماوەیەكی پێدەچێت

دووەم: دەوالی  -Varicose_veins during pregnancy 
دەوالـی/ بەو ملوولە خوێنانە دوترێ كە ئاوساون و لە ڕووی پێستەوە دیارن كە زیاتر لە لاقی كەسەكە دەبینرێ بەڵام ئەكرێ لە شوێنی تریش دەركەون وەكو كۆم و دامێن. 
هۆی دەوالی چـیە لەكاتی دووگیانی دا؟

بە هۆی زیادبوونی قەبارەی خوێن و بەرزی هۆرمۆنی ئیسترۆجین و ئەو پەستانەی كە دەكەوێتە سەر شاخوێنهێنەری خوارەوەی دڵ٤٠% ی خانمان توشی دەوالی دەبن.

ئایا مەترسیدارە؟ كەی چاكدەبێتەوە؟
بە گشتی بێ مەترسییە و هیچ پێویست بە دووڵی ناكا و دوای لە دایكبوونی كۆرپەكەت بەرەبەرە ملوولەكان دەچنەوە باری ئاسایی خۆیان 
هەرچەندە ڕێگریكردن لە دەوالی كاتی دوگیانی قورسە بەڵام ئەكرێ ئەم خاڵانە یارمەتیدەربن خراپتر نەبێت 
1-تا ئەتوانی بجوڵێ: جوڵە و چالاكی جەستەیی سوڕی خوێن چالاك دەكات و ئەكرێ بەسوود بێت 
2-قاچت بۆ ماوەیەكی زۆر مەنوشتێنەوە و لەسەریەك دامەنێ  و بۆ ماوەیەكی زۆر بە یەك شێوە دامەنیشە
3-قاچەكانت با بەرزبێت لە كاتی دانیشتن 
4-پێڵاوی بەرز لە پێ مەكە 
5-هەندێ گۆرەویی تایبەت یان جلی خانمان تایبەت بە دووگیانی لەوانەیە سودبەخش بێت

سێیەم : خورانی پێست بەهۆی كێشەی جگەرەوە 
ئەم حاڵەتە تایـبەتە بە كاتی دووگیانییەوە كە لە كۆتاییەكانی ماوەی سكپڕی توشی هەندێ لە خانمان دەبێت، خورانی زۆر و بێ سوربوونەوە لە دەست و قاچ ڕوودەدات كە لەوانەیە هەندێ شوێنی تریش بگرێتەوە. 
خـورانی زۆری پێست نیشانەی سەرەكی حاڵەتەكەیە 
هۆكار چییە؟ 
هۆیە سەرەكیەكەی نـاڕوونە بەڵام ئەكرێ چەند هۆیەكی ژینگەیی و جینیی و هۆڕمۆنیی بەشدار بن كە زەرداو ناتوانێ جگەر بەجێبهێڵێت و لەوانەیە لە خوێندا زۆر ببێت و كێشە دروست بكات
هەواڵە خۆشەكە ئەوەیە دوای لەدایكبوونی منداڵەكەت  كێشەكە كۆتایی دێت 
ئەگەر ئەم نیشانەت هەیە سەردانی دكتۆر بكە چونكە لەوانەیە كێشە بۆ كۆرپەكەت دروستببێت یان پێویست بكات بە دەرهێنان یان هاندانی لە دایكبوون بكات