مەترسیی ڕۆشنبیری ترسنۆك و مەلای داعشبیر لەباشوور

7 رۆژ پێش ئێستا

بۆچی بیری نەتەوەییمان لەقوشبندایە ؟
د.سالار تاوگۆزی
ڕۆشنبیری ترسنۆك و  بێدەنگ مەترسیدارترە لە مەلای داعشبیر. 

ئەگەر ترسنۆكیی زۆرێك لەڕۆشنبیرانی كورد نەبایە، ئێستا مەسەلەن لەكوردستاندا ئەبو جیهاد و  مەلا حەنزەڵەی توندڕەو لەگەڵ بانگخواز تەڵحەی داعشبیر سوكایەتییان بەنەتەوەو نیشتیمان و ئاڵا و كەمینەكان و ژن نەدەكرد و كلتووری جنێو و سوكایەتییان بڵاو نەدەكردەوە و بەڕاست و چەپدا خەڵكیان كافر نەدەكرد و فەزای گشتی و سۆشیاڵ میدیایان داگیر نەدەكرد و نەیاندەكردن بە گۆڕەپانی بۆڕبۆڕێنی خۆیان. 

گەر ڕۆشنبیر لەكایەكەدا بوێرانە بەرانبەر بە كلتووری مەرگدۆستیی و ڕوخێنەری سەحرانشینەكان و خورافەچییەكان و حەكایەتخوانە ترسناكەكان بوەستایە و كلتووری ژیاندۆستی بڵاو بكردایەتەوە، هەنوكە دەسەڵاتیش نازی بانگخوازێكی عەوام خەڵەتێن و مەلایەكی سەلەفیی موشتاقی هەڵنەدەگرت كە سەر لەبەری پەرتوكەكانی ناو پەرتوكخانەكەی وەك بۆمبی چێنراون لەناو عەقڵی مسوڵمانانی كوردستانی باشووردا، ئەو باشوورەی كە گوتاری سەلەفیزمی كۆنەپارێز تێیدا تەكی بەگوتاری نەتەوەیی هەڵچنیوە، ئەو باشوورەی كە تارمایی دێوەزمەی تۆقێنەری سەلەفیی و ئیخوانیی باڵی بەسەردا كێشاوە، بەشێوەیەك بیری نەتەوەیی خستووەتە قوشبنەوە. 

 من ئەم قسانەم ناگشتێنم، بەڵام بەشێوەیەكی گشتی ڕۆشنبیرانی باشووری كوردستان دەستیان بەكڵاوی خۆیانەوە گرتووە و گۆڕەپانەكەیان بۆ مەلا و بانگخوازی هەڵگری ڤایرۆسی بیری سەلەفیزم و ئیخوانیزم چۆڵ كردووە، بۆیە دەسەڵاتیش ناچارە نازی مەلایەكی سەلەفیی موشتاق و بانگخوازێكی مەرگدۆست زیاتر هەڵبگرێت. 

خۆزگە گشت ڕۆشنبیرانی باشوور هێندەی (شێرزاد حەسەن) بوێری ئەوەیان هەبووایە بەبێ ماسك پەنجە لەسەر برینە فیكری و پەروەردەیی و زانستیی و دەروونیی و كۆمەڵایەتییەكانمان دابنێن.