فیلمی (THE BATMAN)، پەیامی تۆڵەسەندنەوە لە سیاسییەكان

6 رۆژ پێش ئێستا

هێژا دڵشاد
(BATMAN) باتمان- پیاوی شەمشەمەكوێرە، لە زنجیرە فیلمێك پێكدێت، كە مێژووە سینەماییەكەی دەگەڕێتەوە بۆ ساڵی 1943 وەك یەكەم بەرهەمی سینەمایی لەو كاتەوە تاكو ئێستا ، ئەفسانەی (باتمان) پیاوی شەمشەمەكوێرە، دەیان فیلمی لێ بەرهەمهاتووە. 
بەشێوەیەكی گشتی، لە فیلمەكانی باتمان، كارەكتەری (باتمان) پیاوی شەمشەمەكوێرە، لەدژی پیاوە خراپەكان دەجەنگێت، لەكوێ خراپەكاری و تاوانكاری هەبێت، ئەو روبەڕوویان دەبێتەوە، هاوكات باتمان هەمیشە هاوكاری پۆلیس دەكات بۆ دەستگیركرن و دۆزینەوەی تاوانباران.
لە بەرامبەر كارەكتەری باتمان-دا، وەك كارەكتەری پاڵەوان، كارەكتەری ( JOKER)جۆكەر هەیە، ئەم كارەكتەرە وەك دژە پاڵەوان هەمیشە لەگەڵ باتمان-دا لە شەڕدایە، كارەكتەرێكی دژە پاڵەوانە و رۆڵی سەرەكی لە تاوانكارییەكاندا دەگێڕێت، لەبەرئەوەشە بەردەوام روبەڕووی باتمان دەبێتەوە. دەكرێ بڵێین كارەكتەری جۆكەر، یەك لە دژە پاڵەوانە هەرە بەناوبانگەكانی سینەمای هۆڵیوودە، كە هەمیشە بینەر بە وردییەوە سەری جوڵەكانی دەكات. 
ئەوەی فیلمی باتمان-ی ئەمجارە لەفیلمە باتمانەكانیتر جیادەكاتەوە،پەیامە سیاسییەكەیەتی بەڕایگشتی و بە سیاسییەكانی جیهان، پەیامێَكی گرنگە، جۆرە تۆڵەسەندنەوەیەكە لە سیاسییەكان كە رەنگە ئەم ویستە لەدڵی مرۆڤەكانی زۆربەی وڵاتانی جیهاندا هەبێت، بەڵام مەرج نیە ئەو رق و تۆڵەسەندنەوەیە بە رێگەی توندوتیژییەوە بێت، لەم فیلمەدا ئەو رق و كینەیە نیشاندەدات كە بەرامبەر بە سیسمتی سیاسی و سەرمایەداریی و چینایەتی تەنانەت بە خودی سیاسییەكان، بەرامبەر هەموو ئەو ناهەقی و نادادپەروەرییانەی هەیە كە كارەكتەر بەدیوە توندوتیژییەكەی تۆڵەی خۆی لە سیاسییەكان دەكاتەوە. 
سیاسییەكان پێش ئەوەی بگەنە پۆست و دەسەڵات، بە وتەی باق و بریق بانگەشە بۆ خۆیان دەكەن، كاتێكیش دەگەنە دەسەڵات و تامی پارە و هێز دەكەن، لەبەر بەرژەوەندی خۆیان پشت لە دەنگدەرانیان دەكەن بە ئەندازەی هەموو ئەو گفتانەی لەكاتی بانگەشەدا بە دەنگدەر داویانە. رەنگە ئەم نموزەجە سیاسییە لە زۆربەی وڵاتانی جیهان هەبێت. 
سیڤ هارڤی، میدیاكاری ناوداری ئەمریكی دەربارەی سیاسەت و پارە دەڵێت "لەتەواوی دنیا موچەی سیاسییەكان زۆر نییە، بەڵكو ئەوان زیاتر دەدزن و خۆیان دەوڵەمەند دەكەن".
لێرەوە ئەگەر لە فیلمی (باتمان) ورد بینەوە، بەدیوە سیاسییەكەی پەیامێكی هەڕەشەئامێزە بۆ سیاسییەكانی جیهان، ئەمجارە لەبری كارەكتەری (جۆكەر)، كارەكتەرێكی سایكۆپاس رۆڵی شەڕانگێزی و تاوانكاری بەرامبەر بە سیاسییەكان دەگێڕێت، ئەم كارەكتەرە لەهەوڵی تۆڵەسەندنەوەدایە لە سیاسییەكان، هەر لە سەرۆكی شارەوانی، سەرۆكی دادگا و بەرپرسانی پۆلیس و ئەمنی شارێك، كە لەپاش گەیشتن بە دەسەڵات، تێوەگلاون بە گەندەڵی، ئەمانە لە لەو تایپانەن كە لەكاتی بانگەشەی هەڵبژاردندا، گفت بە خەڵك دەدەن تاكوو كاری باشیان بۆ بكەن، بەڵام لەپاش هەڵبژاردنیان و گەیشتن بە پۆست و دەسەڵات، بەجۆرێك گفتەكانیان لەیاد دەكەن و بە گەندەڵییەوە تێوەدەگلێن، بۆیە كارەكتەرە سایكۆپاسەكە، هەوڵی تیرۆركردنی یەك بە یەكی ئەو بەرپرسانە دەدات كە راستگۆنەبوون لە گفتەكانیان و لەسەر لاشەكەشیان دەنوسێت (درۆكان)، مەبەستی لەوەیە درۆیان لەگەڵ خەڵك و دەنگدەر كردووە. 
تاوانبار لەگەڵ كوشتنی هەر بەرپرسێك دەنوسێت (درۆكان)، لێرەدا كەسی سایكۆپاس وەك تاوانبارێك، دەیەوێت پەیامێك بدات بەو سیاسییانەی كە گفتیان بە خەڵك داوە و دواتر راستگۆ نەبوون، كە ئەوانیش بەهەمان دەرد دەبات.
فیلمی باتمان-ی ئەمجارە، پەیامە سیاسییەكەی گرنگە، پەیامێك لە بەڵێنی درۆی سیاسییەكان لەهەركوێیەكی ئەم جیهانە بن، ئەم فیلمە پێمان دەڵێت چیتر هەموو سیاسییەكانی جیهان، گفتەكانیان لەگەڵ كردارەكانیاندا یەكناگرێتەوە و پێشمان دەڵێت، درۆی سیاسییەكان لەمڕۆدا بۆتە دیاردەیەكی جیهانیی، پەیامێكی بەهێزیشە بۆ هەموو   سیاسییەكان.