بازرگانی كڕینی كڵێسا بۆ مزگەوت!!؟

4 رۆژ پێش ئێستا

پشتیوان هەڵەبجەیی
گروپێك ڕیشدار كۆدەبنەوە، لەوانەی ئەها پارەی سۆسیال وەردەگرن و پادشایی دەژین و ژنەكانیان ئیش دەكەن و خۆیان لەفیس بووك و یوتوب جیهاد دەكەن لەدژی ئەو وڵاتەی كە ئارامی و ژیان و ئەمان و خزمەتگوزاری بۆ دابین كردووە و ئەیپارێزێت لەدەست برادینیەكانی خۆی.
ئەمانە ئیشیان چییە، هیچ ئیشیان نیە و بەپارەی كافران و باجی باڕ و دیسكۆ و مەلهاكان دەژین، هەمیشە بیر لەوە دەكەنەوە چۆن ببن بەكەسایەتیەكی گەورەی پارەدار، چوون كلكیان گرێداوە لەگەڵ سیستەمەكەدا و ئەزانن ئیدی هەمووشت دەبێت بەپارە و ئەگەر پارەت پێنەبێت دەستت بەهیچ ناگات.
دێن خەڵووەت دەكێشن چۆن برادینیەكانی خۆیان دادۆشن، لەو حەقیقەتە حاڵی بوون، كە لەئەزەلەوە دین بۆ زۆرینەی پیاوە ئاینیەكان جگە لەبابەتی دادۆشین شتێكی دیكە نەبووە و ئەمانیش هەمان ڕێگا تاقیدەكەنەوە، بەڵام چیدی سەردەمی ئەوە نەماوە لەمزگەوتێكدا دوای نوێژی هەینی بڵێی برا موسڵمانەكان، فەرشەكان كۆن و بۆگەن بوون و ئەمانەوێت بیگۆڕین یان دوو سەرئاوی نوێ زیاد دەكەین یان حەوزی ئاوەكە گەورەدەكەین و بەرماڵێك ڕاخەیت و فەقێیەك دانێی بەدیاریەوە و لەگەڵ سواڵكەرەكەی بەردەرگاش بیكەیت بەشەڕ بڵێی ئەم هەینیە بۆ خۆمانە.
نانا چیدی كاسپیەكە چۆتە قۆناغێكی پێشكەوتووە وە و شێوازی ئەلكترۆنی وەرگرتووە و گروپەكە ئەبن بەچوار پێنج بەشەوە و هەریەكەیان خەڵكی شارێك یان وڵاتێك و زمانێكی جیاواز و نەتەوەیەكی جیاوازن، چوون ئاین و دیموكراسی لەمەدا ڕێكن كە نابێت سنور بۆ ئینسان هەبێت. 
ئەمانە چی دەكەن هەریەكە ژمارە حسابیەك دەكاتەوە و هەریەكە پەیووەندی لەگەڵ تیڤیەكی ئاینیدا هەیە كە بانگەشەیان بۆ دەكەن و زۆرجار مەلاكان بەگریانەوە باسی ئەوە دەكەن كە ئاین لێرە لەگیانەڵادایە و پێویستە لەئەوروپا و ئەمریكاوە بیگەڕێنینەوە. ئیدی بەشێكی بۆ گیرفانی خاوەنی تیڤیەكەیە، وە هەموو ئەندامانی گروپەكە ئاگاداری دزیەكانی یەكتری دەبن بەڵام چوون هەموویان ئیشەكەیان ئاوایە بێدەنگی لێدەكەن تا كاتێك گروپەكە بیەوێت یەكێكیان نان بڕاوبكات، ئەوكات بەناوی خیلافی ئەقیدەیی و شەرعیەوە پەردەلەسەر یەك هەڵدەماڵن و زۆرجار تا ئەخلاقی یەكتریش دەڕۆن، بەڵام هەرگیز ئەو نهێنیە كەشف ناكەن، چوون ئەوە ئیشی هەموویانە و لەدواین سنوریشدا، ئەو سنورە ناشكێنن، چوون ناكرێت موسڵمانان ئاگاداری ئەو حەقیقەتە بن. چوون جگە لەكڕینی كڵێساش، كۆڵان و لادی و كوێرەدێ و ناوچە نیە، هەیكەلێكیان لێقنج نەكردبێتەوە و چەند ژمارە موبایلێكیان دانەنابێت و داوای پارەیان نەكردبێت بۆ دروستكردنی .
یەك دوومانگێك یان ساڵێك دووساڵ پارە بۆ ژمارە حسابیەكە دەڕوات، ژمارەی حسابی چەندین كەس كە لەیەك گروپدا كۆبوونەتەوە و چەند ساڵ جارێك ئەیكەن بەهەرا كە بەپارەی خێرخوازان كڵێسایەك كراوە بەمزگەوت، لالۆحاجیش كە دوومانگ جارێك بەهەزار پاڵنان مووچەیەكی دووسەد هەزاری وەرگرتووە كە ئەسڵەن هیچ شایستەش نیە و پێی حەرامە چوون یەك ڕۆژ پێشمەرگایەتی نەكردووە و بە عەریف خانەنشین كراوە، خەنی ئەبێت كە ئەویش بەپێنج هەزار دینار ناردنی باڵانس بەشدار بووە لەو خێرە گەورەیەدا و لەبەهەشت ڤێلایەكی بۆ خۆی كڕیووە .
مامە حاجی تێناگات كە بەملۆیۆنان كەس بەو جۆرە و لەنەتەوە و زمانی جیاواز بەو جۆرەی ئەویان كردووە و هیچ لیژنەیەك و لێپرسینەوەیەك و حساباتێك لەئارادا نیە خەڵك بپرسێت بڵێت ئەرێ ژمارە حسابیەكانتان چەندی بۆچووە و كڵێساكە بەچەند كڕدراوە و چەند ماوەتەوە و ئەو پارانە دواجار چی بەسەر دێت.
گرنگ ئەوەیە دایەحاجی و پورەحاجی و مامەحاجی بەپێنج هەزاردینار ڤێلایەك بكڕن، جا هەندێك لەمەلای قۆشمەچی بەدەم پێكەنین و ڕابواردن بەئەقڵی مامە حاجیەوە دەڵێت: تۆ هەر عەزێتەكەت كێشاوە فێلایەكت بۆخۆت كڕیووە ئەی كەمێك خێرەكە زیاد ناكەیت و چوار مانگاشی بۆناكرشیت لەگەڵ چوار پوورەی هەنگ و باخێك لەترێ با شیر و هەنگوین و شەرابەكەشت مسۆگەر بێت 
دواتر قۆناغی دووەم دێت كە كڵێساكە دەكڕن و لەبەردەم كڵێساكەدا لایڤ دەكەنەوە و وەك ئەوەی مسجد اڵاقسایان كڕیبێتەوە بەشانازیەوە بەدەم لایڤ و قسەی باق و بریقەوە دەچنە ژوورەوە و حەوشە و ژوورەكان و هۆڵەكە نیشان دەدەن و بەدەم اللە و ئەكبەرەوە ئەوەبیری خەڵك دەبەنەوە كە بۆچی دیمەنی كڕین و حساباتەكەی وێنە ناگرنن بۆچی باسی بڕی كۆكردنەوەی پارەكە و بڕی تێچووی كڕینەكەی ناكەن؟ 
پاشان كە خاچەكەیان داگرت و بەڕەسمی بوو بەموڵكی گروپەكە (نەك ئیسلام) چوون جگە لەئەوان یەك كەس ئاگاداری لەحساباتەكە نیە، یەك كەسی لەگروپەكە بەڕەسمی بۆ دیاری دەكەن بەحساب خزمەتی مزگەوتەكە و موسڵمانان ەكات بەڵام لەژێرەوە بۆ حساباتەكە دایدەنێن چوون سندوقێكی خێری تیا دادەنێن و ژمارە حسابیەكی تێدا دەكەنەوە و ئەوەی سەردانی ئەویچ بكات بەجۆرێك ئیحراجی دەكەن كە بەشتێك بەشدار بێت لەكڕینی ڤێلای بەهەشت.
ئینجا باسی ئەوەش ناكەین زۆرینەی ئەو كڵێسایانە لەشوێنی چەپەك و هەرزاندان و نرخەكەیان ئەوەندە نیە لەچاو بینای باڕێك یان مەلهایەك یان دیسكۆیەك، وە دەوڵەتانی ئەوروپی ئەگەر بیانزانیایە ئەمانە بەحەقیقەت دیندارن و دژی دینی مەسیحی كاردەكەن و ئاینەكە پێشدەخەن بەدڵنیایی بەو ئاسانیە نەیاندەهێشت كڵێسایەك ببێت بەمزگەوت، هەر هیچ نا ئەیانتوانی شارەوانی بیكڕێتەوە و بیكات بەباخچە، بەڵام ئەزانن ئەم گروپانە سەد هێندەی كڵێسا و كافر و موشریك و مولحیدەكان زیان بەئاین دەگەیەنن .

•وتارەكانی ڕوانگە و ڕەخنە گوزارشت لە بۆچونی نوسەرانی دەكات