سلێمانی لە شاری ڕۆشنبیرییەوە بۆ شاری دەستە و تاقمەكان

1 مانگ پێش ئێستا

عەبدولقادر سەعید
شرۆڤەی دۆخی ئیداری و سیاسی شاری سلێمانی لەئێستادا بەجۆرێكە، سەر بەهیچ لۆژیكێكی سیاسی و مەدرەسەیەكی فكری و ئیداری نییە، ئیدارەكەی جۆرە پیادەكردنێكە، لەنێوان ڕوخان و بنیاتنانەوەدا، وەهمێك ئیدارەی ململانێكان دەكات، كە چارەنوسی ئیرادەی بەڕێوەبردن دەخاتە ژێر پرسیار و خراتریش دەیباتە سەر لێواری مەترسییەكی كوشندەوە. 

بەدەر لە سیاسەت و جۆری بەڕێوەبردنەكەی، مەترسیەكی تریش لەئارادایە كە ڕەنگدانەوەی تا ئاستی خوارەوەی دیسپلینە بە هەموو پێكهاتەكانیەوە، نموونە پێكهاتەی ڕۆشنبیریی كە لەفۆرمی دەیان ڕێكخراو و تاقم و دەزگای ڕاگەیاندن و بڵاوكردنەوە و پەیج و كەناڵی وەهمی و سەراپا سۆسیال میدیا كاردەكەن، هیچیان ئاگاداری ئەوی دی نییە و دابەشی دەستە و لایەن و تاقمی جیاجیا بوون و بە بێ ئاگا لەیەكتر كاردەكەن، هەریەكەیان خاوەنی رێنوسی خۆیەتی لەنوسیندا و هەریەكە وەستای داتاشینی وشەی تایبەتن . تەنانەت بە باش و خراپەوە، هەریەكە خاوەنی دەستە و تاقمێكی سەربەخۆیانن لەنوسەر و ئەدیب و میدیاكاری خۆبەراوردكەر بە دایستۆڤسكی و عەقاد، بەكورتی دۆخەكە بەجۆرێكە كار گەیشتۆتە ئەوەی هەركەس زۆر شارەزای ئەم گەمە ناشیرینە نەبیت زمانی باب و باپیری ڕەسەنی خۆت ناناسیتەوە، كە ئەمەش وایكردوە كایەیی رۆشنبیری ئیمە لەباتی بنیاتنان خەریكە دەبێتە مایەی تێكدانی زمانی كوردی بەناوی مۆدێرنە و پێشكەوتنی زمانەوە. 

قسەكە لێرەدایە خۆ گەر بەڕێوەبردن دەستەو تاقمی جیاوازی دروست كردبێت و ئەوەش چارەسەر نەكرێت ئەوا دەستە و تاقمی دەزگا ڕۆشنبیریەكان ئاكامێكی دەبێت كە زمانەكەشمان بەدەردی دۆخی سیاسەت دەبەن و بە تەواوی دەكەوینە ژێر دەست و پێوە، ئەوكاتە تەنیا شتێ كەشانازی مانەوەمان بێت زمانەكەمانە ئەویش بەرەو خەرەندی بیرچونەوە و لەناوچوون دەچێت.