دادگا و ئەسڵی كێشەكە !

2 مانگ پێش ئێستا

دڵشاد ئەنوەر
چاوپێكەوتنەكەی، حاكم ناز نوری، سەرۆكی پێشووی داواكاری گشتی سلێمانی لەگەڵ شارپرێس، نەك نیشانەی پرسیاری لەسەر دامەزراوەی یاسایی لەهەرێم دروستكرد، بەڵكو گەر لە كۆمەڵگایەكی هۆشیارباین، دەبوو ڕای گشتی دژی ئەم دامەزراوەیە دروستبایە و كۆڵ نەدرایە تا ئەو كاتەی چاكسازی ڕیشەیی تێدا ئەنجام دەدرا.
دەمێكە ئەو ڕایە دروستبووە ئەم دامەزراوەیە بەشێكی سەرەكی كێشەكانە، بەڵام كاتێك دادەوەرێك لە هەناوی ئەو دامەزراوەیەوە كۆی پرۆسەكە دەخاتەكە ژێر پرسیارەوە، كەواتە هیچ بیانوویەك نامێنێت بۆ دەستەوەستانبوون بەرامبەری.
بێگومان لە نێو دامەزراوەی دەسەڵاتی دادوەری هەرێم دا، خەڵكی باش و چاكسازیخوازی زۆر تێدایە، پێشتریش دەنگیان هەڵبڕیووە، بەڵام ڕەنگە كەمینە بن، بۆیە دەكرێت قسەكانی حاكم ناز بكرێتە دەرفەتێك بۆ پاڵپشتیكردنی دەنگە كەمینەكان و چیتر نوخبەی هەرێمی كوردستان بێدەنگ نەبن بەرامبەر ئەوەی لەو دامەزراوەیەدا دەگوزەرێ. 

* حاكم ناز نوری دەڵێت؛ منداڵێك لەسەر دزینی بنێشت زیندانی كراوە، دۆسیەكەی تەمیز كردووەتەوە و ئامادەیشی نیشانداوە بۆ واسڵكردنی غەرامەكەی، بەڵام داواكەی ڕەتكراوەتەوە و لە زیندان دا هێڵراوەتەوە.
تا دواجار منداڵەكە لە زیندان دا، خراوەتە نێو كۆمەڵێك نێرباز و دەستدرێژی كراوەتە سەر!
پرسیارەكە ئەوەیە، بنێشت دزین تاوانێ گەورەیە یاخود دەستدرێژی؟ كێ بەرپرسیارە لەو دەستدرێژی یە؟ ئەی بڕیار نیە زیندان شوێنی چاكسازی بێت؟ 
ئایا دادگا شوێنی چاككردنە یان هەڵڕشتنی ڕق و تۆڵە كردنەوە؟

ئەی دادگایەك دڵنیا نەبێت لەبوونی شوێنێكی سەلامەت و چاكساز، چۆن منداڵێكی وا لەسەر تاوانێكی وا بچوك سزا دەدات و دواتر تاوانێكی وا گەورەی دەرهەق دەكرێ؟
ئەی گەر پاساوی دادگا ئەوە بێت ئەوان تەنها سزادان و دیوە یاساییەكەیان لەسەرە، باقیەكەی دەكەوێتە سەر دەسەڵاتی جێبەجێكردن، خۆ دەبێت دادگا لەسەر دابین نەكردنی شوێنی سەلامەت، دەسەڵاتی جێبەجێكردن سزا بدات؟
خۆ ئێستا ساڵی ٢٠٢٢ ەوە، ڕۆژانە هەموومان دەیبیستین، هەمووان خەمی منداڵەكانیانە، لەسەر شتێكی بچووك نەگیرێن و دواتر لە زیندان فێری حەپ خواردن ببن!

*
جارێك لەسەر دۆسیەی ڕۆژنامەنوسێك، لەگەڵ ڕەحمان غەریب و كاوە ئەحمەد و ئاراز محەد و ..هتد، چووینە لای یەكێك لە دادوەرە دیارەكان، گلەییمان لە مامەڵەی كرد، وتی؛ ڕاستەوخۆ بە نێچیرڤان بارزانیم وتووە، ئێمە بۆ سزادانی بەقاڵ دانراوین، ئەگینا نە پیاو ماقوڵمان پێ دەگیرێ، نە مەسول، نە پەرلەمانتار، نە دەسەڵاتدار… ئەم قسە ڕێك لێدوانێكی پێشتری حاكم نازی بۆ گۆڤاری ژن بیر هێنامەوە، كەوتبووی؛ یاسا درۆیە..

*
كاتێك گوێم لە حاكم ناز بوو، وتی؛ مناڵێك لەسەر بنێشت دزین گیرا و دواتر نەتوانرا لە زیندان بپارێزرێ و دەستدرێژی كرایە سەر، هێندە دڵتەنگ بووم، وتم گەر قەرار بێت، باجی دزی، دەستدرێژی بێت، ئەبێ حاڵی ئەو مەسولە قن خرانە چ بێت كە وڵاتیان فەرهود كرد!
كارەساتە، مناڵێك لەسەر دزینی بنێشت بخرێتە زیندان و لەوێش ئەتك بكرێ، كەچی بەهەزارانی تری دزی گەورە دادگا یاسا هەڵسوڕێنن!

*
دادوەری بە ویژدان زۆر شتی پێدەكرێت، ناو بە ناو لێرەو لەوێ دادوەر دەبینین مل نادات، بە فەردە مەسول ڕاپێچ دەكات، بەڵام لەپڕ موئامەرەی لێدەكرێت و نەقڵ دەكرێت، بۆیە تا دەسەڵاتی دادوەری خەڵكی بەجورئەتی تیا بێت، هێندەی تر كاریگەر تر دەبن.

*
بیرمە كاتێك بەرپرسێك لەسەر ڕەتڵێك جنێو بە خوشك و دایكی شەهید كاوە و بەمادەی خراپ بەكارهێنانی موبایل برایە بەردەم دادگا، بە دوو ملیون و نیو حوكمدرا.. دوای ماوەیەك من لەسەر بابەتێكی ڕۆژنامەوانی و سكاڵای بەرپرسێك برامە بەردەم نەفس دادوەر، بەیاسای ڕۆژنامەوانیش كە زۆر سوكترە لە یاسای موبایل، كەچی بە سێ ملیون غەرامە كرام ههه.

*
ساڵەكەم بە دیاریكراوی لە یاد نیە، بەڵام پێموابێت ساڵی ٢٠١٢ بوو، بەیانیەك لەماڵ نوستبووم، بەرپرسێكی بواری مافی مروڤ تێلی كرد، وتی لەدادگام و فڵان بەرپرس هاتووە سكاڵات لەسەر تۆمار دەكات، وتم چۆن؟
وتی؛ بەڵێ..
پاش كەمێك.. تێلی كردەوە.. وتی؛ ئەوە بەرپرسەكە ڕۆشت و دادوەرەكە ڕەوانەی كرد تا بەردەم دەرگا..
ئەوكات كەفالەت سێسەد و یەك هەزار دینار بوو، حازرم كرد، زانیم بانگ دەكرێم، دواتر بانگ كرام، كە یەكێك لە دادگاكانی هەرێم بوو..چوومە ژووری دادوەر، سەر سپیەكی قەڵەوی لابوو، دەرگاكەم بەتەواوەتی نەكردەوە تا بچمە ژوورەوە، جەنابی دادوەر كەدوێنێ بەرپرسەكەی بەڕێكردبوو، توڕەبوو، وتی بۆ تۆمەت هەڵدەبەستی..
منیش هیچ خۆم تێك نەدا، وتم؛ جەنابی دادوەر جارێك من تۆمەتبارم، ئینجا من نەهاتومەتە ژوورەوە خۆت توڕە دەكەی، لەكاتێكدا دوێنێ ئەوت ڕەوانە كردووە، بۆیە ئەمگری ، ئەمكوژی هیچ ئیفادە نادەم.
ئیتر هەوڵی دا وەزعەكە هێور بكاتەوەو دەستی كردە گلەیی لە دۆخەكە، وەلحاڵ بە سێسەد و یەك هەزار بەكەفالەت ئازادی كردم..

*
كاتێك بەلێشاو ڕۆژنامەنوس و چالاكوانی بادینان ڕەوانەی زیندان كران، تەنانەت كونسوڵخانەو رێكخراوە جیهانیەكانیش تێگەشتن لە نێو سلكی دادوەری هەرێم چی دەگوزەرێ، هاتنە دەنگ..

* كاتێك یەكێتی و پارتی لەسەر دادگا دەبێتە كێشەیان، بەرپرسانی هەردوولا تانە لە دادگاكانی سنوری یەك دەدەن، بەرپرسی محەلیان دەڵێت؛ تەڵاقم كەوتبێ، دادگا ناتوانێ بمگرێ..

بۆیە كاتیەتی نوخبەی هەرێمی هەرێمی كوردستان، قسەكانی حاكم ناز نوری وەكو دەرفەتێك بقۆزێتەوەو ڕەخنە لە دامەزراوەی یاسایی بگرێت و داوای دوورخستنەوەی دەستی حیزب و چاكسازی بكات تێیدا.