كە جانتا ڕەشەكەی بابلۆم هەڵڕشت، چیم دی؟

2 مانگ پێش ئێستا

د. بەهات حەسیب قەرەداخی
س: كوردستان 24
1.(بابلۆ) لە كۆتایی شانۆییەكەدا، بەدەست و پێی لێكئاڵاوەوە، لەناخێكی وێرانی پاش بومەلەرزەو زریانەوە، بە قوڕگێكی پڕ حەسرەت و گریانەوە، ڕووی تێكردین و وتی:  "ئێوە تەنانەت حەوزێكی لیخنیشتان نیە تا عەكسی قەمەری تێدا ببینن!!".

70 ساڵ  بەر لە ئێستا، عەبدوڵڵا گۆرانی كرێچی، لەوپەڕی نائومێدییەوە بەحەسرەتەوە وتی:
بەڵێ دیارە، لەناو قەومی بەسیتا، قەدری سەنعەتكار...
وەكو عەكسی قەمەر وایە، لەناو حەوزێكی لیخندا!!

كەچی مەخابن پاشی 70 ساڵ حەوزە لیخنەكەیشمان نەماوە تا وێنەی ئەو مانگە درەوشاوەیەی تێدا بەدی بكەین!!

2. ساڵانێكە، ململانێی حیزبی و هەژموونی ڕاكەڕاكی پۆست و پلەوپایەو ماستاو ساردكردنەوە، بەچەشنێ بوونەتە مۆدێل و تەرزی ژیان، ژینیان لێ كردووین بە ژان! بەجۆرێ بەهاكانی نیشتمان و هونەرو ئەدەب و داهێنان و زانستیان سووككردووە، هەر ئەڵێی هەرگیز بۆ ساتێكیش خانی و جزیری و حەزرەتی ناڵی و مەحوی و گۆران و زیرەك و مەردان و خالقی و قەرەداخی و شێركۆو سالار و سەدان مەزنە شاعیرو هونەرمەندی تر لەم نیشتمانەدا نەژیاون و جێدەست و ئاسەوارێكیان هەر نەبووەو نیە!.  

3. ساڵانێكە مانگا برسییە لاتەكانی مۆتەكە خەونەكەی فیرعەون قەپیان لە نەرمە گۆشتی مانگا شیردەرەكانی مەزرای وشكهەڵاتووی نیشتمان گیركردووە و كەسیش خەمێ لە یوسفێك ناخوات ئەم مۆتەكە خەونەمان بۆ لێكبداتەوە! ساڵانێكە لەم بازاڕە بێ ڕەحمەدا گشت بەهاكان بەكاڵا كراون و مرۆڤیش تێیدا هەرزانترینیانە! میدیایەكی پۆپۆلیستیی دەم شڕو میدیایەكی پیاهەڵدەرو كۆنەخوازیش، شەو و ڕۆژ بۆ  یەكدی لە بۆسەدان و  دەشتودەری وڵات و دڵ و دەروونی خەڵكی بێچارەیان كردووەتە گۆڕەپانی شەڕێكی قێزەون. هەرچیشمان هەیە و نیە خەریكە ببێتە قەزاوەگێڕی بەرژەوەندیی دەمشڕو سادەگۆو مانگا برسییە چڵێسەكانی ناو مۆتەكە خەونەكە!  

4. لەم وشكەساڵییەی ئەدەب و هونەردا، چەند ڕۆژێكە پەڵە هەورێكی بە بارانی وەرزی هات ئاوس، لە سلێمانییەوە ڕووی كردووەتە پایتەخت و ئێواران بۆ ماوەی سەعات و نیوێك بەخوڕ دادەكات!  چ داكردنێك!؟ چون بەختە باران تۆزو گەردی نیشتووی ساڵانێكی سەر دیەو دڵ و دەروونمان دەشواتەوە! پەڵەهەوری (دوا ڕۆژەكانی بابلۆ)یە كە من پێمخۆشە بە (جانتا ڕەشەكەی بابلۆ) ناوی ببەم. هیواو نزام وایە پەڵە هەوری سەرەتای ڕێنسانسێكی كوردی بێ! چونكە بڕوام وایە، هەروەك چۆن سەدان ساڵ لەمەوبەر ڕێنسانس لە منداڵدانی هونەرو ئەدەبەوە سەریهەڵداو ڕەوتی ژیانی سەدان ملیۆن مرۆڤی ئەوروپایی ئەوساو ئێستای گۆڕی و كردنی بە چەقی بەهاكان،لای ئێمەش درەنگ یان زوو هەر دەبێ وابێ ... لە ئەندێشەكانی ڕۆمان و شەققەی باڵی شیعرو ڕەنگ و فڵچە و ژێی كەمان و تەختی شانۆو سكرینی سینەماوە جارێكیتر لەناخەوە ڕابچڵەكێین و ماناو تین و تاوو چێژ بۆ ژیانمان بگێڕینەوە.  

5. پڕ بە گەروومان، قاقامان لێدا، هەمووان تێر پێكەنیین.. تا بەر لە كۆتایی پێمانوابوو بە ئاڵوگۆڕی جانتا ڕەشەكان و جووڵە و قسەی بابلۆ و كارەكتەرەكانی شانۆییەكە پێدەكەنیین، كەچی لە دوا چارەكە سەعاتدا، وەكوو بەڵای ناگەهان، دارێك كێشای بە سەرمانا، شۆكی كردین! بۆمان دەركەوت جانتا رەشەكەی بابلۆ نەجانتای پڕ لە دۆلار بوون، نە جانتای جلوبەرگی ژێرەوەی ژنانەیش! دەركەوت ئەوە هەر جانتا نەبوو، سندووقی رەشی بابلۆ بوو، سندووقی ڕەشی هەمووان! سندووقێكی سیخناخ و پڕ لە نهێنی و گرێ و ڕازو دروشم و ستەم و وەهم و ڕاستیی لینگەوقووچ! هەیهوو هەیهوو! دەركەوت ئێمە هەر لەسەرەتاوە بەخۆمان پێكەنیوین! ئەوە خۆمانیین بووینەتە بووكەڵەو تۆپی بەرشەقی زەمانە .. تێگەیشتین ئەوانەی سەراسیمەو سەرگەردانن ، ئەوانە نین كە لەسەر تەختی شانۆكە ڕاكە ڕاكیانەو بەناو یەكدا دێن و دەچن! ئەوە ئێمەین كە بەچاوی بەستراوەوە بووینەتە داشی سەرتەختەی شەترەنج و بۆ یەكتری لەبۆسەداین!  

6. ئااااااـی .. بابلۆكان چیتان پێكردین!؟ ئەوە چ سیحرێك بوو ئێوە كردتان؟ چ دوعایەكی چاوبەستتان لێكردین؟ ئێوە، ئێمەتان بەناوی كۆمیدیاو پێكەنینەوە پەلكێشكرد، كەچی نوقمی قوڵایی خەم و تراژیدیاو گریانتان كردین!؟

بەڕێزان بڕیار بەدەستانی هەرێم! تكایە بەر لە تەواوبوونی ماوەی نمایشەكەی بابلۆ، ڕۆژێك بەخۆتان و بەرپرسانی وەزارەت و فەرمانگەو دەزگاكانتان، كە پێشبینی دەكەم لە 400 كەس زیاتر نەبن، هۆڵی میدیا پڕبكەنەوە تا ئەو شۆكەی ئێمە ئەزموونمان كرد، ئێوەش بیبینن و بیبیستن و تامیبكەن. ئەگەر پێشتان خۆشبوو ڕۆژانی دوای نمایش پێكەوە قاوەیەك دەخۆینەوەو دوو قسەی تریشمان دەبێت. دڵنیاشبن لەبریی یوسفێك دەیان یوسفی دڵسۆزی ئەم خاك وخەڵك و خودایە ئامادەن مۆتەكە خەونەكەشمان بۆ لێكبدەنەوەو ڕێگەچارەشیان لەلایە! بەڕێزانم... من تێدەگەم ساڵانێكی زۆرە بەهۆی قەیرانی داراییەوە، ناچارن بەقەدەر بەڕەكەتان پێ ڕابكێشن، ئاسوودە بن، نە باسی پارەتان لەگەڵ دەكەم و نە داوای خەرجی زیادەتان لێدەكەم! بەڵام مافی خۆمە داوای ڕەنجی زیادەتان لێ بكەم! ڕەنجی ئێوەش پرسوڕا پێكردن و پلانداڕشتن و بڕیاردان و چاودێری و بەدواداچوونە، كە دڵنیام بە تێچوو و پێچوویەكی زۆر كەم ئەنجامی زۆر باشیان دەبێت.