تیرۆری نەرم … تیرۆری ڕەق!

2 مانگ پێش ئێستا

محمد خۆشناو
تیرۆر دوو مەودای هەیە ؛ مەودای مادی و مەودای هزری«الفكری»، ئەم دوو مەودایە لە لایەن حزب و لایەن و گڕوپی ئاینی ڕادیكالی و پۆپۆلیستیەوە پەیڕەو دەكرێت، بەدوانەی توخمی تۆقاندن و تێكدان دەناسرێن
 یەكەم تۆقاندنەكە» تیرۆری هزریە؛ «ترساندن/ نەرم» كە ڕێگە بۆ دروستكردنی ئایدۆلۆژیایەك خۆشدەكات كە جگە لەخۆی هەموو شتێك دووربخاتەوە
 دووەم : تیرۆری« تێكدان/ مادی« ڕەق» بۆ دروستكردنی دەوڵەتێكی تیرۆرستی ئەڵتەرناتیفی دەوڵەتی نوێ.

ئێستا جەنگی هزری زۆر ترسناك و كوشندەترە لەو جەنگەی كە بە چەك و كەلوپەلی قورسی سەربازی دەكرێت، بۆئەم مەبەستە بوونی ئەنتەرنێت و دەزگای نوێ و پەیوەندیە سنووربەزێنەكان لە ئامرازەكانی تەكنۆلۆژیا و پەیوەندی نوێ یارمەتیدەری ئەو جەنگە هزریەیە كە بەشدارە لە گەیاندنی زانیاری بۆ مێشكی خەڵك لە هەر كوێیەك بێت، كە هەندێك لەو هزرانە هەن لە نیشتیمان دەدەن و، هەندێكی دیكە پڕنسیپەكانی ڕەوشت دەسڕنەوە، ئەمە تیرۆری نەرمە وادەكات.

لێكۆڵینەوەكان لەسەر تیرۆر وایدەبینن كە تیرۆری مادی كاریگەری ڕاستەوخۆی  لەسەر ژێرخانی ئابووری و سیاسی و كۆمەڵایەتی و وڵاتان و كۆمەڵگاكان هەیە، بەڵام زۆر كەس ئاگایان لە بایەخی كاریگەری تیرۆری فكری یان تووندوتیژی مەعنەوی كە « تیرۆری نەرم»ن نیە، ئەم تیرۆرە بەدرێژایی كات و بەشێوەیەكی رێكخراو كار لەسەر دروستكردنی دۆخی هەستكردن بە ترس و تۆقاندن و دوودڵی و نەبوونی ئارامی دەكات، كە ئازارێكی دەروونی وا دروستدەكات كەمتر نەبێت لە ئازار و زیانی تیرۆری مادی و، ترسناكیەكەشی كەمتر نیە لە تیرۆری مادی، ئەگەر تیرۆری مادی ئازاری ڕاستەوخۆی هەبێت، تیرۆری نەرم بەپێی قسەكانی فەیلەسوفی بەناوبانگ« سلاڤۆی ژیژیك» پشت بە « هەموو شێوازەكانی ڕقلێبوونەوە » ی نامادی دەبەستێت بۆ دروستكردنی دۆخێك لە ترسێكی ڕێخراو و هەمیشەییدا لە میانی گومانكردن و بەكافركردن و سەپاندنی نەزانی بەسەر تاكەكەسەكاندا.
دەتوانرێت تیرۆر لە مەودا مادیەكەیدا لەناو ببرێت بە خاپوركردنی مۆڵگەكانیان و كوشتنی سەران و چەكدارەكانیان، بەڵام ئەگەر تیرۆری نەرم یا هزری هێشتا ئامادەبوو ئەوە هەڵدەستێت بە نوێكردنەوەی زیندووێتی تیرۆری مادی، بۆیە پێویستی بە ڕیشەكێشكردنی تیرۆری هزری هەیە.

فەیلەسوفی ئەڵمانی «یۆگن هابرماس»«93» ساڵ لەوبڕوایەدایە كە ( جەوهەری تیرۆر لەسەر كۆتایی هێنان بە جەستەی ئەوەی دیەكەی جیاواز ناوەستێت، بەڵكە لەسەر ڕیشەكێشكردنی ئەو جیاوازیە كە لەنێوان خەڵكدا هەیە دەوەستێت.. هەروەها لەسەر تواناكانیان بۆ مەمڵەكردن بە ئازادی و سەربەخۆیی ) واتە ڕیشەكێشكردنی تاكڕەویەكان «فردیە» و هاوڵاتیبوونەكەیان.
تیرۆری نەرم یا هزری ئەو خواستەیە كە هەوڵدەدات هزری خۆی بەسەردا بسەپێنێت و بەتۆپزی بیئاخنیتە ناو مێشكت، ئەو هزرە دان بەوەی  وادێت  و ئەوەكەی دیكە دانانێت، بڕوای بەوە هەیە ئەگەر لەگەڵ من بیت ڕێگەی ژیانت پێدەدەم، بەڵام ئەگەر جیاواز بیت تۆ دوژمنی منی و جێگات لێرە نابێتەوە، هزری تیرۆری تووندڕەو بریتیە لە یەكەم دوورخستنەوە«اقصا‌و» بەبیروهزرەكان، پاشان دووەم بە چەك، دوورخستنەوەی ئایینی بریتیە لە تووندترین و دڕندەترین و كاریگەرترین دوورخستنەوەكان، تۆ لە كوردستان پێویستت بەوە هەیە منداڵێك دروستبكەیت ویژدانەكەی ئینسانی و كوردستانی بێت و، نەك بارگاوی بكەیت بە بارگەی ئایینی و ئەمە بە جیهاد بزانیت، وەزیفەی خوێندنگا ئەوە نیە خوێنكار ببەیتە بەهەشت یا بە دۆزەخ بیترسێنیت، ئەركەكەی ئەوەیە بیخەیتە ناو میحرابی زانست و هاوڵاتیبوون و داهێنان و دروستكردن و جوانی و بەرزەفڕی خەیاڵ، بەتۆپزی پڕكردنی مێشكی منداڵان لە دایەنگە و ناو خێزان و كۆمەڵگا بە دەقی ئایینی و چیڕۆكە خوێناویەكان مانای دانانی تۆوی داعشە بەسەر خاكی هزری و روحی منداڵەكە كەئەمەش تیرۆری نەرم دروستدەكات .

لەڕاستیدا نابێت ئایین دووربخریتەوە و ناشبێت بەشێوەیەكی ڕەها رەتبكرێتەوە، بەڵكو پێویستە ببێتە خۆراكێكی روحی نەك زۆرانبازی خوینگاكان و، نەبێتە گێچەڵكردن بە ئەوەی دیكەی جیاواز، ئیمڕۆ ئێمە لەهەموو كات زیاتر پێویستیمان بە دروستكردنی ویژدانی هاوبەش هەیە كە وونە و، ئامانجی بنچینەیی فێربوون شان بە شانی معریفە بریتیە لە دروستكردنی ویژدانی هاوبەش .