چوار زللە لە دەسەڵاتی هەرێم

2 مانگ پێش ئێستا

گۆران هەڵەبجەیی
لەماوی كەمتر لە مانگێكدا لە چوار ڕێگەوە، لەچوار لایەنەوە دەسەڵاتدارانی هەرێم لە خراپی دۆخەكەو مەترسی لەسەر ئایندەی كیانەكە ئاگاداركرانەوە،كە دەكرێ ناوی بنێین چوار زللەی بەهێز بۆ بناگوێی بەرپرسانی خەمساردو بێباكی حكومەتی هەرێم، بەتایبەتی پارتی و یەكێتی ،ئەوانەی كە لە  خەیاڵدانیاندا وا وێنای دۆخەكەیان كردوە هەمووشت ئۆكەیە.
١.یەكەم زللەی بەئاگا هێنانەوە لەلایەن نوێنەری نەتەوە یەكرتووەكان لە عێراق [جینین هینیس پلاسخارت  ] بوو كە دووجار سەرانی حیزبەكانی كۆكردەوەو بە ڕاشكاوانە لە مەترسیەكانی سەرهەرێم ئاگاداری كردنەوە،تا ڕادەی ئەگەری لەنێوچوونی ،گەربێت و نەكەونە خۆیان.
كەسێكی وەك [پلاسخارت ] لەخۆڕا قسەفڕێنادات گەر هەستی بە مەترسیەكانی سەرهەرێم نەكردبێت.جێگەی ئاماژەیە پێشتریش لەچەند بۆنەیەكدا سەركردە حیزبی و حكمومیەكانی هەرێمی لەهەمان مەترسی ئاگاداركردەوە ،بەڵام بەم شێوەی ئێستا تووندو ڕاشكاو نەبوو.
٢.ڕاپۆرتەكەی وەزارەتی دەرەوەی ئەمریكا بوو كە ساڵانە سەبارەت بە ڕەوشی مافی مرۆڤ لەوڵاتان دەری دەكات.
ئەو ڕاپۆرتە زۆر بەڕوونی و ئاشكرا ئاماژەی بە چەند خاڵێكی گرنگدا لەوانە: گەندەڵی سەرانی هەردووحیزب،دەستی حیزب لە دامەزراوە حكومیەكاندا،بەرتەسكبوونەوەی ئازادی، فشار بۆ سەر میدیاكاران ،ناڕەزایی خەڵك لە ئەدای حكومەت و تاد.
ڕەخنەكان هێندە وردبوون هێندە درووست بوون وەك ئەوەی كەسێك لە هەرێم نووسیبێتی نەك دەزگای چاودێری وەزارەتی دەرەوەی ئەمریكا كە هەزاران كم دوورە لەهەرێمەوە. ئەوەی سەیرە بێدەنگی دیندار زێباریە كە بەردەوام ڕاپۆرتە جیهانیەكان بەدرۆ دەخاتەوە یا بە پاساوی بێ مانا دایاندەپۆشێت. پێدەچێت ئەمجارە دیندار توانای بەدرۆخستنەوەو پاساوهێنانەوەی نەبێت ،ئەویش بەهۆی ڕاستی و بەهێزی ڕەخنەكانی نێو ئەو ڕاپۆرتە.
٣.سێیەم زللە لە توێژەر و ئەكادمی ناسراوی ئیرانی سادق زیبا كەلامی هات .لە مەراسیمێكدا كە لە هولێر بۆ ناوبراو سازكرابوو ،لەوێدا زۆرێك لەسەركردە حكومی و حیزبیەكان ئامادە بوون بە مەسعود بارزانیشەوە.
دكتۆر سادق بەسادەیی بەڵام جێگر و كاریگەر قسەی كرد،قسەكانی ستایش و  پیاهەڵدان نەبوو بە ئەزموونی هەرێم و ژیری ولێهاتوویی سیاسیەكانی هەرێم ،كە چاوەڕێیان دەكرد، بەڵكو ڕەخنەی جددی بوون لە ئیدارەدانی هەرێم كەبە بۆچوونی ئەو شكستی هێناوە.
سادق زیبا گووتی هۆتێل و ئەپارتمانی بەرز نیشانەی پێشكەوتن نیە،گووتی ئێوە سی ساڵە نەتانتوانیوە  بەباشی وڵات بەڕێوە بەرن،شكستیتان هێناوە لە بواری خوێندن و پەروەردەكردنی گەنجان و نەوێ نوێ .قسەكانی ئامادەبوانی تووشی شۆ كرد بە تایبەتی مەسعود بارزانی و سەرانی حیزبەكەی.ئەوان هەرگیز چاوەڕێیان نەدەكرد میوانێكی ئەودیو سنوور ڕاستەوخۆ بە حزوری خۆیان بە بێ مجامەلەو ڕاشكاوانە ڕەخنەبارانیان بكات.
ئەوان بەوە ڕاهاتوون كە زۆرێك لەو میوانانە لە بۆنەو دیدارەكانیاندا لە ستایشی بێ تام و درۆ بەولاوە شتێك ناڵێن كە سەرانی حیزب و حكومی نیگەران بكات، هەر بۆیەش ئەو جۆرە میوانانە بەرژەوەندیخوازانە  بە باشی پاداشت دەكرێن.
٤. لێدانی زللەی چوارەم لە دیداری سەرۆكی حكومەتی هەرێمی كوردستان مەسرور بارزانی بوو ،لەگەڵ هەندێك لە ڕۆژنامەنووسانی هەرێم. 
لەوێدا سێ جۆر  ڕۆژنامەنووس بوونیان هەبوو،جۆری یەكەم بریتی بوون لە ڕاگەیاندنەكانی دەسەڵات [فەرمی و سێبەر] كە خەریكی جوانكردنی سیمای دەسەڵات بوون،جۆری دووەم ئەوانەبوون كە بێدەنگیان هەڵبژارد[پێدەچێت نەیانویستبێت كێشە بۆ خۆیان درووست بكەن و لەبەرچاوی مەسرور خۆیان ناشیرین بكەن ]،جۆری سێیەم كە كەمینە بوون ،ئەوانە بوون كە بوێرانە قسەی دڵی خەڵكی بەشمەینەتی هەرێمیان كرد. لە نێو ئەمانەشدا {محەمەد ڕەئوف}سەرنووسەری ماڵپەڕی [درەو میدیا] بوو كە ڕەخنەكانی لەدەسەڵات هێندە ڕاشكاوبوون ،هێندە كارییگەربوون كە مەسروری خستە هەڵوێستێكی نەخوازراوەوە،هەرگیز لەو بڕوایەدا نەبوو كەسێك بە جورئەتەوە ڕاستەو خۆ ئەو ڕەخنانەی لێبگرێت،چونكە ئەو بەردەوام گوێی لە ستایشی بێتام بووە.
گەر ئەم چوار زللەیە دەسەڵاتی هەرێم بەئاگا نەهێنێتە و بەخۆیدا نەچێتەوە و دەست بە چاكسازی جددی و هەستپێكراو نەكرێت،{ كە من بەدووری دەزانم} ئەوە دەبێ چاوەڕێی خراپترو دۆخی سەخت تربكەین.