مەرگ دۆستی و خیانەت لە تیكتۆك

14/09/2022

هۆزان شەریفی
سەرنجم لە كۆمەڵێك ڤیدیۆی تیكتۆكی كوردی دا (ئەو ڤیدیۆیانەی كە بێ سوودن) بە كورتی دوو بابەتم لا گەڵاڵە بوو. ئەوانیش مەرگ دۆستی و خیانەتە. 
- مەرگ دۆستی: زۆرێك لە ڤیدیۆی گەنج و نەوجەوانانم بینی كە لەگەڵ چەند گۆرانییەكی خەمناك ڤیدیۆیان كردبوو، باس باسی مەرگ و مردن و گۆڕ و وەسێت و پاش مەرگ بوو. 
تێناگەم بۆچی ئەمانە هێندە خوازیاری مردنن؟ ئەوەندەی هەوڵمدا وەڵامی ئەم پرسیارە لای خۆم بدەمەوە ئەوەندەی تێگەیشتم؛ ئەوان خوازیارن ئەو وێنەیە بخەنە بەرچاو كە دوای مەرگیان شین و ڕۆ ڕۆ دەست پێ دەكات و داخ بۆ مەرگیان هەڵئەكێشرێت و هاورێ و یار و كەسوكار بۆی پەشیمان دەبنەوە! 
پێمان ئەڵێن ڕۆژێك ئەڕۆین، بەڵام لەگەڵ ئەوەشدا كەسی ئاسایین و وەك هەر كەسی دیكە، نازانم چ بۆشاییەكی جیاواز لە هەر كەسێك جێدێڵن تا هۆشیاریمان بەنێ؟ باشە تەنها لەبەر ئەوە مەرگ دۆستن؟

- خیانەت: ئەو ڕەهەندەی دیكەی ڤیدیۆكان باس باسی خیانەت بوو. خیانەتی برادەر و خزم و لە هەمووی خەمناكتر خیانەتی یار. 
لەم ڤیدیۆیانە كەسەكان وا دەر ئەكەون و گۆرانی ئەڵێنەوە كە ئەمان دوژمندارن و هەڕەشە لە دوژمنەكانیان ئەكەن و خیانەتی هاوڕێ و یارەكانیان ئەوانی نەڕووخاندووە و هێشتا بەرامبەر دوژمن وەستاوە! 
تێناگەم بۆچی ئەم هەموو دوژمنە وەهمییە؟ پێشتر وتوومە خەڵكی ئێمە خەڵكێكی دوژمندارە و پێی وایە بەردەوام كەسێك هەوڵی خستنی ئەو ئەدات!