دۆزەخ ...

14/09/2022

سەمەد زەنگەنە
دڵنیابن دۆزەخ جێگەی هەمومانی تێدا دەبێتەوە ، بۆ سەلماندنی ئەوەی كێ لە هەموكەس گوناهبارترو تاوانبارترە ، پێویست بەو هەموو ململانێ و توندوتیژییە ناكات .
(دستۆفسكی)
 مەلا مینبەری خوای جێهێشتوەو هەموو ڕۆژێك بە مایكێكەوە فێمێنیزمێك دەهاڕێ، فێمێنیزمێكیش مەلا دەكوتێ و شەرع و دەق و پەیامەكانیشی بە زاڵم ناودەبات .

ڕۆژێك هاوسەرگیری مسیار دەكەن بە داهێنانی ئەو ڕۆژەی بەردەم مایكەكان و هەر مەلاو بانگخوازو شەرعناسێك فتوای شەرعیبون و ناشەرعیبون، حەڵاڵی و حەرامی بە باڵادا دەبڕێت، لەم لاشەوە هاوسەرگیریی تەلەفۆن و ئەنتەرنێت و گەشتوگوزار سەرهەڵدەدات .

لەملاوە شێخێكی تەریقەت شەقامێكی سەرەكی دەگرێ و ئەندەرپاسی پێباش نیە، لەولاشەوە دەروێش و موریدەكانی سنوری وڵاتان دەبڕن و بە شمشێرو چەقۆو پرچی درێژەوە دەبنە میراتگری شێخانی خانەقاو شاری كاك ئەحمەدی شێخ، ئەو كاك ئەحمەدەی لە كۆرۆ مەجلیسەكانیدا گاورو موسوڵمان، ئینگیزو كوردو عەرەب یەكسان و هاوتا بون بەرامبەر بە خودا، شێخ ڕەزای تاڵەبانی و بەگەكانی خۆش مەشرەب شەڕە شیعری هەجویان دەكردو هەموشیان لە خۆشەویستی ڕوحی شێخدا توابونەوە.
شێخ ڕەزا هەجوی مام و برازاو عەشیرەتەكەی خۆشی دەكرد ، بەڵام خۆی دەكرد بە سەگی بەر دەركەی كاك ئەحمەدی شێخ
 مەربوتە حەیاتم بە سلێمانی و خاكی
خۆزگەم بە سەگی قاپی ئەحمەدی كاكی

سەلەفی تینوی خوێنی عەلمانیەو تەمەننا دەكات ماڵ و مناڵی لە برسا بمرن، شاگەشكە بوە بە بڕینی موچەی كارمەندانی ئەو مەلا بەختیارەی باوەڕی بە خودا هەیە .
عەلمانییەكانیش سەلەفیەت بە بەردی سەر ڕێگای پێشكەوتنی مرۆڤایەتی دەزانن ..

لەچك بۆتە بابەتی كۆڕی فەلسەفەی سوكرات و داهێنانی ئایفۆن و چاوی جیمس وێب و گفتوگۆی وەرگرتنی نۆبڵ .
ڕیشی درێژو سمێڵ و شەرواڵ و پانتۆڵی كورتی سەلەفیانیش بۆتە ڕقی معاویە بۆ عەلی و شیعە بۆ سوننە.

لەم هەرێمەی مندا سیاسەت تیۆری ماكیاڤێلیەو سەردەم ڕۆژگاری سەدە تاریكەكانی مێژوە، سیاسەتمەداریش قونی بە كورسیەكەیەوە لەحیم كردوەو دەخوازێت وەكو قانیعی هەژاری شاعیر بە كورسیەكەیەوە بنێژرێت، نەبادا لە سەحرای ڕۆژی حەشرا لەسەر خۆڵی دۆزەخ چوارمشقی دانیشێت و قونی داغ بێت .

لەم هەرێمەدا دەوڵەمەند دەوڵەمەندترو هەژار هەژارتر دەبێ .

لەم هەرێمەی مندا ،ژنی بێ لەچك و تەنورەو پانتۆڵ و سترێج لەپێ دوژمنی خوایە، دەركەوتنی پرچی خاوی درێژ و ئاڵۆسكاوی كورتیش هۆكاری وروژاندنی غەریزە حەیوانییەكای پیاوە .
بۆنی ڕیشی درێژو شەرواڵ و مرادخانی و سیواكیش بۆنێكی تیژی لوتە تەجمیلكراوە بێ هەستەكانی ژنە .

لەم بازاڕی بێ مەعریفەی وڵاتەكەی مندا، ئەوەی دوو ئایەت و حەدیسی لەبەركردبێ موفتی ژیان و مردنی منە، ئەوەی چەند لاپەڕەیەك لە وتارێكی سیمۆن دی بوفواری خوێندبێتەوە فێمێنیزمی عەیار بیست و چوارەو دوژمنی سەرسەختی پیاوانە.

ئەو كەسەی چەن وشەیەكی لكێندراوی سیاسەتی ڕیزكردبێ و تیڤیەكی حزبی ناوداری كردبێ چاودێری سیاسی و توێژەری تێوریای ئەفلاتونە لە كۆمارەكەیدا .

ئەو كەسەی شەوێك بە سەرخۆشی و لە كۆڕێكی هاوڕێكانیدا چەند بەندێكی وتبێ و ئەوانیش هەر بە سەرخۆشی پێیان وتبێ دەنگت خۆشە، ئێستە هونەرمەندی گۆرانیبێژەو كۆنسێرت دەكات .
ئەو كەسەی لە شەوێكی تەنیایدا پارەی بوتڵە عارەقێكی فەلی نەبوبێ و لەبەر خۆیەوە چەند دێڕێك وشەی بێ وەزن و قافیەی ڕیزكردبێ و بە شیعری زانیبێ، ئێستا شاعیرەو دیوانیشی هەیە .

شەوانی ئەم وڵاتەی من بۆتە دیوەخانی بەر لە دروستكردنی هۆتێلەكان، بۆنی تەپاڵەو پشقل و میزی تەڕی زەردباوی هێسترەكان و مێخەكی نێو خورجێنەی ڕێبواران و دەفتەری شیعری پەڕەزەردی نێو باخەڵی نالی لە سەفەری نەگەڕاوەی غوربەت و دیوانەكەی سالم لە داخی كۆچی نالیدا لە سوچێكا توڕهەڵداراوی لێدێت.

ئەم وڵاتەی من بۆنی خوێنی وشكی كیژانی سەربڕاوی شەرەفی لێدێت .
نیوەشەوی ئەم وڵاتەی من دەنگی وەهانا هاتنی گەنجانی دەریای ئیجە كاسی دەكات .
نوزەی بە ئاستەم بیستراوی خانەنشینانی لێدێت كە لە سەرەی وەرگرتنی موچەدا ڕوح دەسپێرن.
وێنەی بزەیەكی درۆزنانەی كچە چاوگەشەكانی ترافیك لایتەكان تابلۆی ئاسمانی وڵاتەكەم دەنەخشێنێ و ڕوحی بێكاسۆ وەخەبەر دێنێ .

لەم وڵاتەدا هەموو پەلەمانە یەكتری بخەڵەتێنین لە پێناو هیچ، كیژۆلەیەك پێكەنینێكت بۆ دەكات تەنها بۆ ئەوەی قوتی ئەو ڕۆژەی پێ ببەخشی، كوڕێكی گەنج ڕەنگە دەرچوی زانكۆیەك بێت شوشەی تازە غەسلكراوی ئۆتۆمبێلەكەت بە ئیسفەنجێكی خۆڵاوی دەسڕێتەوە بۆ ئەوەی هەزار دینارێكی بەیتێ و تۆش دڵی دەشكێنی و دەڵێی دەستت شكێ ئێستە شتومە.

ژنێكی ڕوسور، شەریفێك،كە لە هەمومان شەریفترە، مێردە ناوگەڵ ئاڵۆشاویەكەی ڕوەو ئەوروپای كچانی سپی پێستی خوێنسارد بە جێی هێشتوە و ئامادەیە بۆ پاروە نانی مناڵەكانی پارچەیەك لە پاكیزەیی خۆی بفرۆشێت، تۆش هەروەكو شوتی بكڕی بۆ دڵنیابون لە سوریی و پڕیەكەی چەندجارێك بە جەستە شەرمنەكەیا دەكێشی و ڕەنگە بە دڵت نەبێ و نەشیكڕی.

لەم وڵاتەدا هەموو دوژمنی یەكدین و ڕوڕەشی ئەو خودایەشین كە تەنها لە دڵە بۆگەنەكانمان دەڕوانێ ، ئەو دڵانەی قەترەیەك لە سۆزو دڵۆپێك لە میهرەبانی و غرامێك لە خۆشەویستی تێدا نیە .
هەربژی وڵاتی من....