شكست و سەركەوتنی حزبە ئیسلامیەكان

3 مانگ پێش ئێستا

نەوشیروان حسێن
یەكێك لە تەكنیكەكانی زاڵبون و باڵادەستی بریتییە لە دروستكردنی هەستی سەركەوتن لای بەرانبەر. یانی تێكشكاندنی لە مەیدانە سەرەكییەكەدا، بەڵام پێدانی سەركەوتنێكی وەهمی یان سەركەوتنێكی بچوك بۆ ئەوەی لە لایەكەوە بەردەوام بێت لە گەمەكە و لە لایەكی دیكەشەوە هەست بە گەورەیی و قوڵی شكستەكەی نەكات. 
لەم ڕۆژانەدا حیزبە ئیسلامییەكان دڵیان بەوە خۆشە كە فشارەكانیان ڕێگر بووە لە گۆڕینی بابەتی پەروەردەی ئیسلامی لە پڕۆگرامەكانی خوێندن و بەهۆی ئەوانەوە  شەقامێكی سلێمانی پاك كراوەتەوە و كەسانی ھاوڕەگەزخوازی تێدا نەماوە. 
ئەندام و لایەنگرانی حیزبە ئیسلامییەكان نابێت دڵیان بەوە خۆش بێت، چونكە ئەوە سەركەوتنێكی وەهمی یان سەركەوتنێكی زۆر بچوكە بە بەراورد بە شكستە سیاسییە گەورە و قوڵەكەیان. ئاخر ئامانجی هەرە سەرەكی حیزبی سیاسی بریتییە لە كێبركێ بۆ گرتنە دەستی دەسەڵات. تۆ كە لەم مەیدانەدا شكستت هێناوە و ئومێدی گرتنە دەسەڵاتت نییە، دڵخۆشكردن بەو وردە سەركەوتنانە كە لە بنەڕەتدا ئیشی ڕێكخراوێكی مەدەنی و چەند چالاكوانێكە، خۆخەڵەتاندنە. 
ئەمە وتەیەكی 'د. مستەفا محمود'م بیردەهێنێتەوە كە دەڵێ سەیر لەوەدایە لە وڵاتە عەرەبییەكاندا ئەو قەناعەتە بۆ خەڵك دروستكراوە كە گەیشتنە مۆندیال سەركەوتن و دەسكەوتێكی مەزنە، بەڵام زۆر ئاساییە كەرتی خوێندن و تەندروستی وێران و داتەپیو بێت!
 جا هەر بەو جۆرە، مەعقول نییە ئیسلامییەكان دڵیان بەم وردە سەركەوتنانە خۆش بێت و بە دەسكەوتێكی گەورەی بزانن، كەچی لە ئاست دەیان قەیرانی قوڵی سیاسی و ئابوری هەرێمی كوردستان، بینەر و بێكاریگەر بن و هاوكێشەكەش ئاسایی بێت لایان!