ئیتر ئاوایە سلێمانی

12/11/2022

سۆزان حەمە تاتە
هەركات یادی دروستكردنی شاری سلێمانی دەكرێتەوە، مێژوویەكم دێتەوە پێشچاو كە سیخناخە لە جوانی، پاكی، لێبووردەیی، چاكەكاری و شۆڕشگێڕی.
كە دەبینم سلێمانی باڵای هێندەی گۆیژە و ئەزمەر و قەندیل و هەڵگورد بەرزە، ئیتر بە رۆح لە ئامێزی دەگرم، حەزەكەم هەركات یادی سلێمانی دەكرێتەوە لەوێ بم، پیاسەیەكی كوچە و كۆڵانەكانی بكەم، رۆحی ماندووم بە هەوای پاك و ژینگە جوانەكەی ئارام بكەمەوە.
سلێمانی شارێكی ئاسایی نییە، بەڵكو كوردستانێكی بچووككراوەیە، مێژووی بەرخودانی كورد و بزووتنەوە شۆڕشگێڕییەكەیەتی، هەر شەقامێكی رەنگی پارچەیەكی كوردستانی گەورەی گرتووە، بۆ ئەوەشی بە مێژووی كوردستان و كورد ئاشنابیت، هەر خوێندنەوەی مێژووی بەرخودانكاریی سلێمانیت بەسە.
سلێمانی سیحری تایبەتیی خۆی هەیە، هەركە سێك تیایدا بژیت خاڵی دەبێتەوە لە رق و كینە، بەڵكو دڵی پڕ  پڕدەبێت لە خۆشەویستی و میهرەبانی.
كە لە سلێمانی بژیت، ئیرەیی بە كەس نابەیت، چونكە دەزانی كێ رۆژێك بەو شارەشدا تێپەڕبووبێت، ئەو ئیرەیی بە خەڵكەكەی دەبات.
لاپەڕەكانی مێژووی سلێمانی پڕە لە خوێن و خەندە، خوێن بۆ نیشتیمان و خەندەش بۆ سەركەوتنە مەزنەكانی.
كاتێك كەسێكی سلێمانی دڵی بەخۆی دەسوتێت لەبەرئەوە نییە هەست بە بێ كەسی بكات، بەڵكو لەبەرئەوەیە كە هاوشارییەكی دەبینێت لەو زیاتر قوربانیی بۆ نیشتیمانەكەی داوە.
رۆژانی زووی سلێمانیم دێتەوە یاد، ئەوكاتانەی كە لەوێوە گەنجیم كردە قوربانیی كوردستان، كچێك بووم سروودی ئازادییم دەچڕی، لەگەڵ براكانم كە دواترئەوان  رۆحیان بە نیشتیمان بەخشی، چپەمان  لەپێناو گەیشتن بە رۆژی ئازادی و سەربەستیی كوردستان دەكرد، ئێمە بووینە هەڵگری بیری ئازادییخوازیی كوردستان، بەڵام لەناو رۆحی سلێمانییەوە.
جوانیی سلێمانی لە مانگی چواردەش ناچێ، بەڵكو سلێمانی بۆ خۆی مانگی كوردستانە، تا ئەوكاتەشی خۆری لێوە هەڵبێت، سلێمانیش هەر بنە و رێگە كاروانی ئازادیخوازییە.
شێخ مەحموودی حەفید، پیرەمێرد و نالی و سالم و كوردی، برایم ئەحمەد و رەفیق حیلمی، مام جەلال ، رۆژنامەی ژیان و ژین و گۆڤاری رزگاری، دواتریش شۆڕشی نوێ و خوێندنی بانگی حەق لە شەرارەوە هەر لە قوتابخانەی كوردایەتیی سلێمانییەوە بەرەو لووتكە هەنگاویان نا.
چەند لە سلێمانی دووربیت، هەر هەست دەكەیت لە ئامێزیدایت، چەندە نزیكیشی بیت زیاتر خۆشت دەوێت، ئیتر ئاوایە سلێمانی.