وەسیەتنامە...

17/11/2022

پاوڵا یعقوبیان
 وەرگێڕانی: پشكۆ ناكام  
لەسەر جێگای بەرەو مەرگ، ئەندام پارلەمانێكی" لوبنان" لە پەیجەكەی خۆیا وەسیەتنامەیەكی بۆ كوڕەكەی نووسیوە و ئەڵێ:
من ئەمڕۆ لەسەر جێگای مەرگم، دوای چەند مانگێك یان چەند هەفتەیەك یان لەوانەیە چەند سەعاتێكا ماڵئاوایی لە ژیان بكەم، بەڵام لە دوای خۆم خەیاڵم هەر لای تۆ و خانەوادەكەمە..
لە چەند ڕۆژێكا موڵك و ماڵ و سەروەت و سامانێكی زۆر و دەیان ئۆتۆمبیلت بۆ بەجێ ئەهێڵم كە بە سەدان ملیۆن دۆلار لە ناوە و لەدەرەوەی ووڵات مەزەنە ئەكرێ.... 
بەندە زیاتر لە بیست و پێنج ساڵ  شەو و ڕۆژ لە دەسەڵاتا كارم كردوە لەسەر زەوت كردن و دزینی پارەی گشتی دەوڵەت و باجی هاووڵاتیان، هیچ ترسێكم لە دۆڕانی ئەو سەروەتە نیە چونكە تۆ و خوشك و براكانت دەرچووی پێشكەوتوو و بەرزترین قوتابخانە و زانكۆكانی جیهانن، ئەوەنە زانیاری و لێزانینتان هەیە كە پارێزگاری لێ بكەن و كۆمپانیا و سەروەت و موڵكەكان بەرن بەڕێوە.. بەڵام كوڕی خۆم، شتێكی گەورە و مەزنتر لە كۆمپانیا و ماڵ و موڵكەكانت بۆ بەجێ ئەهێڵم كە من لەبەر نەبونی كات پەشیمانم كە فێرم نەكردوویت چۆن بەڕێوەی بەری و بیانپارێزی و هونەر و ئسوڵی دزیم فێر نەكردوویت، بەڵام لە چەند ڕۆژێكا هەمووی هی تۆیە.. 
لە نیشتمانی گەندەڵیا حیزبێكی سیاسی گەورەم بۆ بەجێ هێشتوویت كە ڕەعیەتێكی سەروو دووسەد هەزار "مەڕ"ی لە هەموو بۆنە و هەڵبژاردەكانا لە دەسەڵات ئەتهێڵنەوە، ئامادەی خۆ كوشتن و گڕ بەردانە ووڵاتن لەبەر خاتری پەنجە بچكۆلەیەكتا، ئەركی تۆیە ئەوانە وەك" "ڕەعیەت" بهێڵیتەوە.. 
لە بیرت بێ كوڕەكەم كە دوژمنی سەرەكی ئەو نەیارە "ڕكابەر" سیاسیە نیە كە لە سەكۆ و ئامرازەكانی میدیاوە بەگژ یەكا ئەچین، ئەو نەیارە هاوپەیمانی سەرەكیمانە و بە دەیان بەرژەوەندی ئابووری هاوبەشی دروست بووی گەندەڵی ئەم ووڵاتە بەیەكەوەمان ئەبەستێ.. 
چاك بزانە ئەو هەموو قەیرانە سیاسیانە هیچ نین جگە لە چەند شانۆگەرییەك كە لە گەڵ نەیاری سیاسیمانا ڕێكەوتنی لەسەر كراوە بۆ پاراستنی ڕەعیەتی هەردوو لامان و گەندەڵی هەردوو لا بشارێتەوە.. ڕۆڵەكەم، هیچ بۆنەیەكی ناوخۆیی، نیشتمانی، نەتەوەیی، ئایینی، جیهانی جێمەهێڵە پێش ئەوەی بازوی سیاسی خۆت دەرنەخەیت لە میدیاكانا و لەڕێی گۆڕانكاری ناو مەڕەكانا لە ناچاریشا پەنا بۆ چەند دروشمێك بەرە كە لە ناو خەڵكا باون و لەگەڵ ئەو دروشمانە چەند دروشمێك بڵێ كە باس لە چاكسازی و بەگژا چوونی گەندەڵی ئەكەن، بەڵام نەكەی جێ بەجێیان بكەیت چونكە ئێمە پێویستمان بە دروشمی قەبە و گڕە بۆ مانەوەی دەسەڵات و گەندەڵی ئێستامان، جگە لە بەرژەوەندییە شەخسییەكانمان، بە تایبەتی ئەو دروشمانەی باس لە گیروگرفتی ڕۆژانە ئەكەن وەك: قەیرانی كارەبا، ئاو، خۆڵ و خاشاك، مافەكانی ژنان بۆ لە خشتەبردنی خەڵك و لەبیر بردنەوەی قەیرانە گەورەكانی لە گەندەڵییەوە دروست ئەبن... 
دوژمنی ڕاستەقینە ئەوانەن كە چاكسازی و بەگژاچونەوەی گەندەڵییان لەم ووڵاتەیا ئەوێ و ئەبێ بە هەموو شێوەیەك دژیان بوەستیت، مەڕە كەللە پووتەكان بۆ هەڕەشە و تێهەڵان بنێرە سەریان، لە میدیاكانی ئەو تەلەفزیۆن و ڕادیۆ و ڕۆژنامە و تۆڕە كۆمەڵایەتی و پەیجانەی بۆم بەجێ هێشتوویت تەخوینیان بكە و بە خۆفرۆش ناویان بێنە لە ڕێی بڵاو كردنەوەی ڕاپۆرتی ساختە دەربارەی خۆ فرۆشتنیان بە موخابەراتی ئیقلیمیەكان كە چاویان بە ووڵاتەكەمان هەڵنایە. لەو دادگایانەی دەسەڵاتێكی زۆرت هەیە بەسەریانا تاوانی جۆر بە جۆریان بۆ بهۆننەوە.. 
ئاگاداری ئەو ڕۆژە بە كە پەشیمانی دادت نایا و مەڕەكان "ڕەعیەت" لەسەر مافەكانی خۆیان و گەندەڵییەكانی ئێمە ووشیار ئەبنەوە و بە ئاگا یەن، توند دەست بگرە بە دەسەڵاتی نەژاد خواز و بنەماڵییەوە، چونكە دوا چەكی سەركەوتنی دوا جارە.. 
ئەم وەسیەتە ئەمانەتێكە بیگەیەنیتە مناڵ و وەچەكانت.. هەر بژین لەگەڵ مەزهەب و نەژاد و ئاڵتون و بنەماڵە و دۆلار.. 

لە پەیجی تایبەتی پارلەمەنتاری لوبنانی " پاوڵا یعقوبیان" وەرگیراوە.....