ئەحمەد كایا دەنگێگ توركی رەگەزپەرست كپیكرد

17/11/2022

رێبوار حەمە
ئەمرۆ 22 ساڵ تێپەڕ دەبێت بەسەر كۆچی دوایی ئەحمەد كایا هونەرمەندی ناوداری باكوری كوردستان ، كایا لە 28ی تشرینی یەكەمی ساڵی 1958 لە شاری مەڵەتی باكوری كوردستان لەدایكبووەو خاوەن دەنگ و سۆزێكی تایبەتە، یەكێكە لەو هەزاران هەزار كوردەی لەلایەن توركە رەگەزپەرستەكانەوە هێرشی كراوەتە سەرو ناچاركراوە توركیا جێبهێڵێت و لە پەناهەندەی كۆچی دوایی بكات.
ئەحمەد كایا دوای بردنەوەی خەڵاتی باشترین گۆرانیبێژی ساڵ لە 10ی شوباتی 1999 لە بەرنامەیەكی راستەوخۆی تەلەفزیۆنیدا دەڵێت كوردەو لە ئەلبومە نوێكەیدا گۆڕانی كوردی هەیە، دوای ئەو قسانە توركە توندڕەو و نەژادپەرستەكان هێرشیانكردە سەری ، لە 30ی نیسانی هەمان ساڵ دادگای ئاسایشی نیشتمانی توركیا تۆمەتی ناپاكی نیشتمانی ئاراستەكرد، لەیەكەم دانیشتنی دادگا بەشداریكرد و هەموو تۆمەتەكانی رەتكردەوەو لەبەشێكی بەرگرینامەكەیدا وتی: تا تەمەنی 42 ساڵی لەم وڵاتەدا بە توركی بیرم كردۆتەوەو بەتوركی گۆرانیم وتووە، هاووڵاتیەكی ئەم دنیایەم كە خۆی بەموڵكی هیچ ناوچەیەك نازانێ و هەست و سۆزم سنوردار نەكردوە بە ھیچ شێوەیەك تا ئەو ڕادەیە كەسێكی مۆسیقاژەنم. دڵم ئەوەندە گەورەیە جێگای چاكەی گشت زمان و كولتوور و باوەڕو گۆرانییەكانی دنیای تێدا دەبێتەوە.
دوای یەكەم دانیشتنی دادگا رووی لە ئەوروپا كرد و لەكاتی سەردانی بۆ پاریس بەمەبەستی رێكخستنی كۆنسێرێت لە شوێنی حەوانەوەی خۆی لە  16ی تشرینی دووەمی 2000 كۆچی دوایی كرد و لە گۆڕستانی ناودارانی پاریس (پیرلاشیز) بەخاكسپێردرا لە هەمان ئەو گۆڕستانەی( یەلماز گۆنەی) تێدا بەخاكسپێردراوە.