لە ژیانی تایبەتی كەسەكانەوە، بۆ وێنەی مردوو

19/11/2022

هێمن عەبدولقادر
لە كۆمێنت بنووسە ژمارە (١) ڕاستەوخۆ لینكی ڕوداوەكەت بۆ ئەنێرین ، میدیای كوردی بەرەو كوێ؟

 میدیای كوردی لە گێژاوێكدایە دەستی بەهەرچی بگات دەیكات بەكەرەستەی میدیایی یان ڕاستتر و وردتر دەیكات بە كەرەستەی كۆكردنەوەی لایك و كۆمێنت و ڤیو .
(جف بریدمور) لە كتێبی (ئەلف بێی كاركردن لە كەنالەكانی ڕاگەیاندن)دا دەلێت:
ڕۆژنامەكان بۆ ئەوەی زۆر ترین خوێنەر لە خۆیان كۆكەنەوە ناجار گرنگی بە كۆمەڵێك شت بدەن كە دورن لە كاری ڕۆژنامەگەری و میدیاییەوە .
ئامانج لە كۆكردنەوەی خوێنەری زۆر پێدانی زانیاری نیە، بەڵكو هەر سایت و ڕۆژنامە و تەلەفیزیۆن و پەیجێك خوێنەر و بینەر و سەردانیكەری زۆر بوو ، باشتر دەتوانێت ڕاوی كۆمپانیا گەورەكانی ڕیكلام و بازرگانی بكات بۆ ئەوەی ڕیكلامەكانیان بهێننە ئەو دەزگایە ، یاخود دەزگاكە تا ئەو شوێنە گرنگی بە خوێنەرەكانی دەددات كە لە سەفقەیەكی گوماناویدا بیفرۆشێت بە كەسایەتیەك ، یان شوێنێك ئەسڵەن لە بنەرەتدا ئەو كەسانەی كار لە دەزگاكەشدا دەكەن هەر نازانن ئەو كارە ڕویداوە

دووەم ؛-
لەهیچ شوێنێكی دنیادا نەبووە كابرا كوڕەكەی یان كچەكەی یان بوكەكەی كوژراو بێت ، تۆ بچی لەژێر خێمەكە بیهێنیتە دەرەوە، یان ڕاستەوخۆ بەو شۆكە گەورەیەوە بیخەیتە ناو لایڤەوە و  بڵێی (هەستت چۆنە؟ یان قسەتان چییە؟) تەنها لەناو میدیای كورد نەبێت ، تەنانەت كونەپەپویەكیش ئەگەر بێچوەكەی مردار ببێتەوە چەند سەعات و ڕۆژێك بەدیاریەوە بە بێ دەنگی هەڵ ئەكوڕمێت.

سێیەم؛-
هەموو میدیا و دادگاكانی دونیاش زۆر جار ناتوانن دەستیان بگات بە نهێنی نەخۆش یان (قوربانی) تەنها لە هەندێك حاڵەتی تایبەت نەبێت ، كەچی لێرە تەنانەت (مامۆستای ئاینی و پزیشكی دادوەری و مامۆستای زانكۆ و پزیشكی دەرونی و ئەفسەر و توێژەر و پارێزەر و ..هتد) هەرچی هەڵئەستێت دوور لە هەموو ئیتیكێكی كار و پیشەی دەست ئەكەن بەگێڕانەوەی ئەو چیرۆكانەی كە ڕۆژانە سەردانیان ئەكەن یان تەلەفۆنیان بۆ ئەكەن ، كە ئەمە لەهەر وڵاتێكی یاساسەرەوەریدا بێت دەبێت لە لایەن داواكاری گشتییەوە داوایان لەسەر تۆمار بكرێت ، نەوەك بهێنرێت لە ناو میدیادا چاوپێكەوتنیان لەگەڵ بكرێت و بەرنامەیان بۆ ساز بكرێت 

چوارەم ؛- 
وێنەی پوری كوژراوەكە ببینە ! بزانە خاڵی ئەو كەسەی لە كەشتیەكە نوقم بووە چی ئەڵێ ! خوشكی ئەو كەسەی پیكابەكەی وەرگەڕاوە  لێدوانێكی تایبەتی بۆ كەناڵەكەمان داوە ! ئێستا ڕاستەوخۆ ئەچینە لای مامی ئەو منداڵەی كە دەڕنەفیزەكەی قوتداوە ! 
جاران وایەری سەتەلایتەكەت لێئەكردەوە، یان تەلەفزیۆنەكەت ئەكوژاندەوە ئیتر ڕزگارت ئەبوو ، ئێستا هەر پەیجە و مایكێك و ئیسفنجێكی دروست كردووە و ناوی لە خۆی ناوە (دەزگای میدیایی) ، لەو ناو بازاڕەیا داوای كەبابێك ئەكەیت ، لەپڕ دانەیەك دێتە بەردەمت (بەڕای تۆ كاتی خۆی هێرشی بارباڕۆسا و پێرڵ هاربەر بۆچی ڕویدا) برا من تەماتەیەكی برژاو لە دەمما گیری كردووە ،دوو تەن چیمەنتۆ بەسەر لاشەی ئازیزترین كەسەكانمەوەیەوە  بارباڕۆسای چی وپێرڵ هاربەری چی؟  
ئەوە ئیتر بە سەیرانگا و سەرقەبران و مۆڵ و چێشتخانە و فەرمانگە و كافتریادا بڵاو بونەتەوە ، تەنانەت ناهێڵن دۆندرمەیەكیش بە ئیسراحەت بخۆی ، ئیتر ئەوە یەكێك لە بازاڕ بەبەردەوامی خەڵك ئەخاتە گریان و مۆسیقای حەزینی خستۆتە سەر ، ئەوە یەكێك ڕوماڵی سوتانی مۆلیدە ئەكات ، دانەیەك خەریكی پەخشی راستەوخۆیە پیكابكێی تاك كەوتۆتە ناو ئاوێكەوە ، یەكێك و یەكێك و یەكێك.
كاتێك ناپلیۆن بە (جوزیف فۆشیە)ی وەزیری ناوخۆی وڵاتەكەی، وت فەرمانی دەستگیركردن بۆ یەكێك لە سەرنوسەری ڕۆژنامەكانی ئەو سەردەمە دەر بكات ، فۆشییە ئامۆژگاری ناپلیۆنی كرد كە ئەو كارە نەكات ، ناپلیۆن لە وەڵامدا وتی (سێ ڕۆژنامەی خراپ) لەهەزار شمشێر بەدەست مەترسی دار ترن.

*مناڵێكی بچكۆلە لە لافاوەكەی پار چەند ڕۆژێك تەرمەكەی دیار نەما، میدیای كوردی ڕۆژی دوو سێ جار ئەو دایكەیان ئەكوشتەوە
**لە ئێستادا ئەم تایپە لە میدیا بەقەد لایڤچی و كچە مۆدێلەكان و جگەری بەستوو و ڕۆنی زەیت مەترسین بۆسەر ژیانی كۆمەڵایەتی و دەرونی خەڵك 
***تاكە شتێك كە لە ژیانما لێی پەشیمان نیم، ئەوەیە كە نزیكەی پێنج شەش ساڵێكە چۆن خۆم لە شەكر و برنج و نانی سپی و گۆشتی سور و چەوری پاراستووە ئاوا بەتەواویی خۆم لە دەركەوتن لە میدیایی بیستتراو و نوسرا و بینراوی ئەم مەملەكەتە پاراستووە 
****بەهیچ جۆرێك پێم خۆش نییە بابەتی من لە سایت و پەیجی هیچ دەزگایەكی ڕاگەیاندن و میدیایی بڵاو بكرێتەوە، بەم بابەتەو هەر بابەتێكی تریشەوە، با ئەمەندە بەس بێت هیوادارم ناچار نەبین ڕۆژێك تانوپۆی ئەم باسە لە بێژنگ و كەوی بدەین و هەرچی سەركۆزەرەی ئەم خەرمانەیە بیخەینە سەر.
***** جاران فیلم و وێنەی تایبەتیان بڵاو ئەكردیتەوە ئێستا تابوت و كفن و ناو گۆڕەكەت ((لەگەڵ ئەو پەڕی ڕێزم كە خەڵكێكی زۆر باش و بەڕێز و پیشەیی لەناو كایەكە ئیش ئەكەن و ئەوانیش گیریان خواردووە بەدەست ئەو دۆخەوە) 
كورد ئەڵێ:-
( كە مامان زۆر بوو سەری مناڵ گیر ئەخوات)
 كە ئەو هەموو لایڤ و میدیا و دەزگایە زۆر بوو تەنانەت ناوێری ڕەسمێكی خۆشت بەدڵی خۆی بڵاو بكەیتەوە چونكە لە بێ ئیشیدا ئەنوسن (بەپەلە بزانە فڵان كەس چی بڵاوكردەوە) ،چ جای بگات بە ئەوەی كە كارەساتێكت لێبقەومێ، لە كۆڵت نابنەوە
حاجی قادری كۆیی وتەنی:-
گەلێ قسەم لە دڵابوو،  حیكایەتم مابوو
كەچی لەبەختی كەچم ، (لێیگەڕێ) خامە نوكی لێرە شكا