ئەگەر شەهیدەکان بێنەوە

21/11/2022

عەزیز ڕەئووف
شەهید قوربانی دۆخی بەرگرییە لە ماڵ نەک بەڕێوەبردنی ماڵ. شەهید کۆمەک بە سەردەمی بەرەنگاری و دۆخی پاراستن و مانەوە دەکات، نەک دۆخی بەڕێوەبردن و حوکمڕانی و هەڵکردن لەگەڵ بەرهەمی دۆخی بەرگری و قۆناغی دوای تفەنگ.
شەهیدەکان تا ئەو کاتە کۆمەک دەکەن کە بەرگری لەئارادابێت، لەوە بترازێ شەهید هیچ کۆمەک بە هەنگاوەکانی دواتر ناکات. بۆ نمونە یەکێتی کێشەی شەهیدبوون و خوێنی سوری نیە، یەکێتی خوێنی زۆر ڕشتووە، بەڵکو یەکێتی لە ئێستادا کێشەی عەقڵ و بەڕێوەبردنی هەیە. 
مرۆڤ سەری دەسوڕمێت یەکێتیەک ئەم هەموو شەهیدەی دابێت، چون نەتیجەکەی ئەم سەرکردایەتیە بووە. جیاوازی یەکێتی لەگەڵ پارتی ئەوەیە کە یەکێتی بە بەجێنەهێشتنی سەنگەر و شەهیدێکی زۆرەوە کەمترین دەسکەوت و پارتی بە هەڵهاتنی زۆر و کەمترین شەهیدەوە  زۆرترین قازانجی کردووە و توانیوەتی ڕەقەم یەک بێت لە ناو پارتە کوردیەکان و یەکێتی ناو پارتەکەشی باشتر لە یەکێتی بپارێزێت.
زۆربوونی شەهید لە پارتێکی سیاسیدا بەمانای سیاسەتێکی حەکیمانە و ستراتیژێکی دووربین نایات، خۆی ئەسڵەن زۆربوونی شەهید واتە سیاسەتی هەڵە، پارتێک زۆر شەهید بدات مانای ئازایەتی نیە، مانای حەماسەتە بەبێ بیرکردنەوە و ستراتیژ. بەمانایەکی تر کە یەکێتی شەهیدی زۆرە بەو مانایە نیە هەڵگری ستراتیژی دوورمەودایە بەڵکو زۆربوونی شەهید لە هەر دۆخ و سەردەمێکدا بەمانای نەخوێندنەوەی واقیعەکەیە. گرنگە پارتی سیاسی زۆرترین دەسکەوت بەدەست بێنێت بە کەمترین شەهید و قوربانی.
مەسەلەن هەموو ئەو شەهیدانەی یەکێتی لە ناوەڕاستی حەفتاکانەوە تا سەرەتای نەوەتەکان خوێنیان بەخشی ئەگەر شەهیدیش نەبوونایە چی ڕوویدەدا؟ بەراستی ڕاپەڕین بەرهەمی شەهیدەکانە یان سەرکێشی دیکتاتۆرێک لە بەغدا و هەنگاوی ئەمریکیەکان بۆ پاراستنی هەرێمی کوردستان؟ باشە ئەگەر ڕاپەڕین بەرهەمی خوێنی شەهیدانە، خۆ پارتی کەمترین شەهیدی بەخشیوە و زۆرینەی دەسەڵاتەکان لە هەرێمی کوردستان لەژێر دەستی ئەم پارتەدایە. 
خراپترین دۆخی حزبی سیاسی خۆهەڵکێشانە بە شەهیدەکانەوە. شەهیید سەردەمی قۆناغێکی ترە و ئێمە لەسەردەمێکی تردا دەژین. سنگدەرپەڕاندن بە شەهیدەکانەوە قێزەونترین کردەی ئەو سەرکردانەن کە ناتوانن لە ئێستادا حزب بەڕێوەبەرن بە خوێنی شەهیدەکان دەیانەوێت وا پیشان بدەن کە حزب تەندروستی باشە.
ئەی ئەگەر شەهیدەکان بێنەوە و ئەم دۆخەی ئێستای ببینن