درامای بێ گوناه

هێمن مەحمود
"هەمووان گوناهێکیان کردووەو هەمووانیش خۆیان بەبێ گوناه دەزانن"
چەند شەوێکە سەرقاڵی تەماشاکردنی ئەم دراما ئێرانییەم کە بەرهەمی ساڵی 2022و بەڕای من یەکێکە لەهەرە دراما ناوازەو پڕ مانا و جوانەکان کە شایانی ئەوەیە تەماشا بکرێت و کاتێکی تایبەتی بۆ تەرخانبکرێت.
جوانی ئەم درامایە لەوەدایە کەسایەتییە سەرەکییەکانی تەنیا دوو خێزانن کە بەجۆرێک لەجۆرەکان چارەنووسی ئەندامەکانی پێکەوە بەستراون و هەمووان لەبازنەیەکی داخراودا ژیانیان دەخولێتەوەو هەرچەندە لەدەستی یەک هەڵدێن بەڵام دواجار دەگەنەوە بۆ یەکتری.
خاڵێکی سەرنجڕاکێشتری ئەم درامایە عەشق و چارەنوسی عاشقەکانە بەجۆرێک لەجۆرەکان هیچ کات و دۆخێک لەبەرژەوەندییان نییەو پێچەوانەی شەپۆلی ژیانەوە مەلە دەکەن و دەخرێنە کونجە تاریکەکانی بیرەوەرییەوە.
مەرگ و پارە و سەروەت و سامان و سەفەر و خۆ ونکردن بەشێکی دیکەی ئەم درامایە و پاڵەوانەکانی تا کۆتا سات ڕووبەرووی دەرئەنجامەکانی دەبنەوە، هاوکات ڕووداوە کتوپڕ و چاوەڕواننەکراوەکان و قەدەری چاوەڕواننەکراو هێندەی تر ئەم درامایەی جوانترکردووەو مرۆڤ ناچار دەکەن یەک سات چاو لەو حیوار و دایالۆگانەی ناو دراماکە نەبڕێت چونکە چاوت لەسەری لاچوون ئەوا شتێکی گرنگت لەدەست دەرچووە و دەبێت جارێکی دیکە سەیری بکەیتەوە.
ئەم درامایە چیرۆکی ژیانە، ژیانی هەر کەسێک لەئێمەی بەجۆرێک لەجۆرەکان تیادایە، چیرۆکی ئەو تاوانانەیە کە بەبێ گوناهی و لەناچاریدا ڕوودەدەن و ژیانمان دەکەنە دۆزەخ..چیرۆکی عیشق و دابڕان و شەڕی چارەنووس و قەدەری ئەو مرۆڤانەیە کە هیچیان بەدەست نییەو هەموو شتێکیش دەکەن لەپێناوی ژیان و مانەوەدا..
ئەم درامایە دوای تەواوبوونی و تەماشاکردنی ئیدی ناخی مرۆڤت بیردەکەوێتەوەو ئەو دڵخۆشی و گەشبینییەت ناهێڵێ بەرامبەر بە مرۆڤ کە گوایە کائینێکی بێ گوناه و پاک و بەریئە، بەڵکە گومانت لەتەواوی مرۆڤەکان بۆ درووستدەکات کە هەر یەکەیان لەژێر ناوی بێ گوناهیدا تاوانێکی ئەنجامداوە و وا خۆی نمایشدەکات کە بێ گوناهە...!
ئەمە چیرۆکی هەموو مرۆڤێکە کە ڕەنگە لەپێناوی پارەدا، لەپێناوی عەشقدا، لەپێناوی ژیانکردنێکی کورتی چەند ساڵە سڵ لەئەنجامدانی هیچ گوناهێک نەکاتەوە و ئەنجامی بدات.