بۆچی فێستیڤاڵی قوتابخانەکان لە سلێمانی وون دەبێت؟

گۆران نامیق
چالاکی هونەری قوتابخانەکان لە سلێمانی چەندین ساڵە فێستیڤاڵی هونەری ساز دەکات لەژێر ناونیشانی (فیستیڤاڵی چالاکی هونەری قوتابخانەکان) بۆ هەریەک لە هونەرەکانی (شانۆ ، موزیک ، شێوەکای) ئەم فیستیڤاڵە بە باخچەی ساوایان و قوتابخانە بنەرەتی و ئامادەییەکانەوە ، بەهەردوو یەکەی ڕۆژهەڵات و ڕۆژئاوا و بەرێوەبەرێتی گشییەوە ، بەقوتابخانە حکومی و ناحکومییەکانەوە زیاتر لە سەد نمایشی شانۆیی پێشکەش دەکرێت بەقوتابیان و مامۆستایان و دایکان و باوکان .. 
بۆچی ماندوبوونی مامۆستایانی هونەر و قووتابیانی بەشداربووی چالاکییەکان و ئەو بەڕێوەبەرە تێگەیشتووانەی کە نابنە بەربەست و کێشە بۆ مامۆستایانی هونەر و هاوکاریان دەبن ، نادیدە دەگیرێت ، تەنانەت ڕێز و سوپاسێکیان پێ ڕەوا نابینرێت ؟
 بۆچی دڵسۆزی ئەو سەرپەرشتیارانەی بەبێ هیچ دەرماڵەیەک ، بەردەوام لە هاتوچۆدان و ڕۆژانە لەم باخچە بۆ ئەو باخچە لەم بنەڕەتی بۆ ئەو ئامادەیی ڕاکەڕاکیانە تا کارە هونەرییەکان سەرپێبخەن و ڕۆژەکانی نمایش ڕێکبخەن ، دیارنییە و هیچ کەسێک نایبینێت و نایبیستێت ؟
بۆچی ئەم فێستیڤاڵە نابێتە ڕووداوێکی گەورە و هونەرمەندان و خەڵکی شار و دەزگا پەیوەندیدارەکانی ڕۆشنبیران و هونەرمەندان و تەنانەت وەزارەتی پەروەردە و بەڕێوەبەرایەتی گشتی پەروەردەی سلێمانی و بەڕێوەبەرێتییەکانی هەردوو یەکەی ڕۆژهەڵات و ڕۆژئاوا وەک پێویست لێی بە ئاگا نین ؟ 
بێگومان هۆکار زۆرن بەڵام هەوڵدەدەم لێرە چەند خاڵێکی گرنگ بخەمە ڕوو .
١- نەبوونی ڕاگەیاندنێک کە بتوانێت هەواڵەکانی ئامادەکاری و ڕۆژانی نمایشەکان بگەیەنێتە هەموو لایەک و کەناڵەکانی ڕاگەیاندن . 
٢- دیاری نەکردنی لیژنەکانی هەڵسەنگاندن لە دەرەوەی بەڕێوەبەرێتی چالاکی هونەری قوتابخانەکان .
٣- پەرشوبڵاوی و کۆنەکردنەوەی کارە هونەرییەکان لە چەند هۆڵێکی دیاریکراو لە دەرەوەی قوتابخانەکان .
٤- میوانداری نەکردنی ئەو ئەدیب و هونەرمەندانەی لەبوارەکانی شانۆی منداڵدا ئەزموون و خزمەتیان هەیە ، لە دەرەوە و ناوەوەی سلێمانی .
٥- گرنگی نەدان بە کۆتا ڕۆژ (خیتامی) نەبوونی خەڵات بۆ بەشدار بووان و نەبوونی پلەبەندی یەکەم و دووەم و سێیەمەکان لە بوارە جیاجیاکانی نواندن ، دەرهێنان ، دەق ، سینۆگرافیا بۆ قوتابخانە دواناوەندییەکان….
٦- دیاری نەکردنی ناوێک بۆ فیستیڤاڵەکە لەبری (فیستڤاڵی چالاکی هونەری قوتابخانەکان ) .
٧- نەبوونی ڕۆژێکی دیاری کراو ، کە هەموو ساڵێک قوتابخانە بەشداربووەکانی پێوە پەیوەست بکات ، هاوکات دانانی ڕۆژێکی دیاریکراو بۆ کۆتا نمایش و سازدانی ئاهەنگی کۆتایی فێستیڤاڵ .
٨- گرنگی نەدان و نەبوونی پۆستەر و دەلیل .
ێ‌-نەبوونی پۆستەرێکی یەکگرتوو کە گوزارشت لە کۆی فێستیڤاڵەکە بکات و هەموو بەشداربووان بەهی خۆیانی بزانن .
ب- دەلیلێک کە کۆی زانیارییەکانی لەسەر یەک بە یەکی نمایشەکان و ڕۆژ و کات و شوێنی نمایش و ناوی تەواوی بەشدار بووان و ئامادکاران لەخۆ بگرێت .
٩- گرنگیدانی زۆری بەرپرسانی پەروەردە بە فێستیڤاڵەکانی شێوەکاری و قردێلە بڕین و دەرکەوتن .
١٠- نەبوونی هەڵوێست و هەڵوەستە بەرانبەر بەو قوتابخانانەی گرنگی بەو جۆرە چالاکیانە نادەن .