یەكێتی گۆڵی لە خۆی كرد

04/05/2021

رێبوار كەریم وەلی

رێبوار كەریم وەلی
پارتی حزبێكی سەخییە لە كڕین و فرۆشتنی ئینسان، بەڵام لە بەخشینی دەسەڵات وەك دوكانداری جولەكە وایە؛ بڵێ دوو جاران دوو دەكاتە چەند؟ دەڵێ: لێم دەكڕی یان دەفرۆشی؟
*
پارتی ئەگەر زانیبای گۆڕان كەڵكی ماوە، قەت وا بە ئاسانی نەیدەهێشت كۆبوونەوە (نهێنییەكان) بگەنە ئەنجام. بە دڵنییایەوە تا پارتیش لای لە گۆڕان كردبایەوە و پشی پشی بۆ كردبایە، گۆڕان نەدەچووە ناو كۆشی یەكێتی؛ گۆڕانێك لە لوتكەی كاری سیاسیدا ٨ كورسی لە پەرلەمانی بەغدا هێنابێت، ئێستا چەند دێنێ؟ بۆیە پارتیش لە بەرامبەر ئەو هەنگاوەدا، جگە لەوەی قەڵای هەولێری قایم كردووە، خەریكی سەودای دیكەی ژێر بەژێرە لەگەڵ نەوەی نوێ.
*
حزبێك كە بەس ئەوەندە ماوە بە ئاشكرا لافیتەی فرۆشتنی لەسەر هەڵواسن، لە خەفادا ئەوەندەی نەدەهێنا كە یەكێتی لەسەر حیسابی بە حیساب گۆڵ كردن لە پارتی ماری نووستووی شارچییەتی لەناوخۆیدا بەخەبەر بێنێتەوە. تەنانەت كار گەیشتە ئەوەی كە كوڕانی كۆسرەت رەسوڵ دەستلەكاركێشانەوەی خۆیان بدەنە سەركردایەتیی یەكێتی!
*
یەكێتی گۆڵی لەخۆی كردووە. هەر لە ئێستاوە جگە لە ناڕەزایەتیی ناوخۆیی، ئەگەری ئەوە هەیە چەند كۆرسییەك لە كیس خۆی بدات. ها ئەگەر بگوترێ ئەوە سەرەتایەكە بۆ تێكەڵبوونەوەیان و ئەوە سەرەتای هەنگاوێكی دوورمەودایە، ئەوەش راست نییە؛ یەكێتی و گۆڕان لە رابردوودا رێككەوتنی ستراتیژیشیان ئیمزا كرد دادی نەدان، ئێستا چ گۆڕاوە؟ سیاسەتكردن بەڕقهەڵگرتن وەك قوماری لێدێت.
*
یەكێتی لە دوای كۆنگرەوە دەرفەتی زۆری لەبەردەم بوو بۆ پێداچوونەوە بە هەڵەكانی رابردووی، بەڵام پێناچێ توانیبێتی بازنەی بیركردنەوەی خۆی بۆ حزبێكی گەورە فراوان بكات، بۆیە باجی هەڵەی لۆكاڵیبوون دەداتەوە، ئەوەش رێك ئەو شتەیە كە پارتی تەمەننای دەكات.
*
دواجار ململانێی لەو شێوەیە لەگەڵ پارتیدا، سودی نییە و لە نیهایەتدا دەبێ لە بارەگای    بارزانی بڵێن:"ئێوە خانەوادەیەكی نەجیبن، بە بەخشندەیی خۆتان لێمان ببوورن."