پاکستان لەجیاتی تاڵیبان بە دەنگ ئیسلامییە کوردەکانی عێراقەوە دێت!

14/09/2021

بەرزان شێخ عوسمان

بارزان شێخ عوسمان
مانگی رابردو ئیسلامیە كوردەكانی عێراق وێڕای پیرۆزبایی لەتاڵیبان، ئیرەییان بە ئەفغانستان برد بەوەی دوبارەكەوتەوە ژێر حوكمی تاڵیبان وشەریعەت، بۆ ئەم مەبەستەش یەكێك لە سەرانی ئیسلامییە كوردەكان رایگەیاند كەسەرانی تاڵیبان ئامادەن بەهانای ئیسلامییەكوردەكانی عێراقەوە بچێت .بەندەش وتارێكم لەو بارەیەوە نوسی، لەم رۆژانەدا هاوڕێیەكم كە لە بواری ئیسلامییەكان شارەزایە دەستخۆشیی لێكردم بۆ وتارەكە ،پاشان وتی "ئەی نەت زانیوە پاكستان كونسوڵخانە لە هەولێر ئەكاتەوە ".
منیش دوای بەدواداچون، زانیم كە باڵیۆزی پاكستان لەعێراق نیازی وڵاتەكەی نیشانداوە بۆ كردنەوەی كونسوڵگەریی فەخریی لە هەولێر . 

ئەم ماستە نەك بێ مو نییە، بەڵكو گوریسێكی گەورەی تیایە، ئەویش زیاتر پتەوكردنی پەیوەندیی تاڵیبان و تاقمە ئیسلامییەكانی پاكستانە، لەگەڵ ئیسلامیە كوردەكانی عێراق، لەرێی تۆڕە موخابەراتییەكانی پاكستانەوە، بە حوكمی ئەوەی پاكستانی سونە مەزهەب حەشارگەی سەرەكیی ئیرهابی ئیسلامییە، كە تاڵیبانی لە هەناوی خۆیدا دروستكرد سەرباری ئەوەی دەیان تاقمی وەك تۆڕی تێرۆریستی حەقانیی، حركەی مجاهدین، جیش محمد لشكر تیبە (جیش الصالحین) ،لەشكر ئای جانگیفی و چەندینی تر لەو وڵاتەدا هەن و هەژمونیان زۆرە .

پاكستانیش كۆمارێكی ئیسلامیی سونی یە،بناغە و سەرچاوەی دەستورەكەی شەریعەتی ئیسلامە، بۆیە روانینی حكومەت و تاقمە ئیسلامییەكان لە یەكترەوە نزیكن، سەرۆكی حكومەتی ئێستا (عمران خان) لەگەڵ رارایی و یاری كردن لەسەر پەتە جۆر بەجۆرەكاندا، بەڵام هەمیشە سەرەنجام بە لای ئیسلامییەكاندا دای ئەیشكێنێت.
هەر لەم روانگەیەوەیە كە  رۆڵی گرنگی بینیوە لە گەڕانەوەی دوبارەی تاڵیبان بۆ ئەفغانستان ،ئێستاش دور نییە پاكستان وەك دەڵاڵێك رۆڵی خۆی نەبینێت لە هەماهەنگیی نێوان تاڵیبان و ئیسلامییە كوردەكان لەرێی كونسوڵگەرییە فەخرییە چاوەڕوانكراوەكەیانەوە.
بۆیە پێویستە حكومەتی هەرێم بە وریاییەوە مامەڵە بكات لەگەڵ ئەم نیاز پیسیەی پاكستانی حەشارگەی قاعیدە و پەروەدەكاری تاڵیبان و ئیرهابی ئیسلامیی.